अफगानं नेपाःमि उद्धारया तयारी

येँ -युद्धग्रस्त देय् अफगानिस्तानया अवस्था जटिल जुया वनेवं थीथी देशं अन च्वनाच्वंपिं थःगु देशया नागरिकता धमाधम लित यंकेगु ज्या शुरु याःसां नेपालं धाःसा आः तक अफगानिस्तानय् थः ग्वःम्ह नागरिक दु व उपिं गन गन च्वनाच्वंगु दु धइगु खँ तकं तिफ्याये फुगु मदुनि ।

अफगानिस्तानय् थः नागरिकया सुरक्षायात ध्यानय् तयाः नेपालं अन च्वंपिं नेपाःमितय्त सम्पर्कय् वयेगु लागिं आह्वान याःगु दु । नापं देशय् दुने नं सुयां थःथितिपिं अफगानिस्तानय् च्वनाच्वंगु दुसा उमिगु बारे जानकारी बियादिसँ धकाः इनाप याःगु दु ।

लिसें नेपाः सरकारं अफगानिस्तान स्थित अमेरिका, बेलायत, क्यानाडा, जर्मनी, युरोपियन युनियन, राष्ट्र संघ आदि थेंज्याःगु निकाययात नेपाःया नागरिकतय्त सुरक्षितपूर्वक तया तयेत इनाप याःगु दु ।

अफगानिस्तानय् च्वंपिं नेपाःमि नागरिकया अवस्था सीकेगु लागिं म्हिगः सरकारं अफगानिस्तानय् मनू छ्वःपिं म्यानपावर कम्पनीतय्त नं थःपिंसं छ्वयापिं नागरिकया पूर्ण विवरण सहित वा धकाः सःतूगु दु ।

अफगानिस्तानय् १५०० म्ह नेपाःमि नागरिक वैध रुपं च्वनाच्वंगु दुसा अवैध रुपं गुलि दु धइगु सी मदुनि । भारत व दुबईपाखें नं गुलिखे नेपाःमि अफगानिस्तानय् च्वनाच्वंगु दु ।
थ्वहे झ्वलय् अफगानिस्तानय् च्वनाच्वंपिं नेपाःमितय् अवस्थायात कयाः म्हिगः संसदया अन्तर्राष्ट्रिय सम्बन्ध समितिइ नं खँ पिहां वःगु दु । समितिं अन च्वनाच्वंपिं नेपाःमितय्त मछिंगु अवस्था वये न्ह्यः हे तुरुन्त हवाई उद्धार यायेगु लागिं सरकारयात निर्देशन बिउगु दु । थुकिया लागिं नेपाल वायुसेवा निगमया विमान छ्वयाः उद्धार यायेमाःगु सुझाव नं वःगु खः ।

विदेशी नागरिक लिहां वने बीगु
राजधानी काबुल दुहां वनेधुंकूपिं तालिवान पुचलं यदि सुं नं देशं अन दुपिं थः नागरियात लित यंके चाहे जूसा उमित यंके बीगु खँ धाःगु दु । राजधानी काबुल लगायत थीथी सहरय् च्वंपिं थःथःपिनि नागरिक लित यंकेगु लागिं अमेरिका, बेलायत व युरोपया थीथी देशं सैनिक हे छ्वयाः उद्धारया ज्या न्ह्याके धुंकूगु दु । तालिवानतय्सं नं सुयां नं थः नागरिक लित यंकेगु खःसा थःपिंसं मपनेगु खँ स्पष्ट यायेधुंकूगु दु ।

वंगु झिन्हुया दुने तालिवानं थःपिनि शक्ति विस्तार यानाः अफगानिस्तानया राजधानी काबुल छगू बाहेक मेगु फुक्क हे प्रमुख सहरत कब्जा यायेधुंकूगु दु । आः तालिवान लडाकुत राजधानी काबुलय् नं दुहां वनेधुंकूगु दु । काबुल कब्जा यायेगु लागिं रक्तपातपूर्ण ज्याखँ मयायेगु कुतः जुयाच्वंगु खँ नं उमिसं धाःगु दु । आः अनया सरकारपाखें शान्तिपूर्ण सत्ता हस्तान्तरणया लागिं वार्ता जुयाच्वंगु खँ नं तालिवानं धाःगु दु । नापं काबुल कब्जा याये फत धाःसा उकिया लसताय् बन्दुक न्यायेकाः उत्सव याके मबीगु नं तालिवानं धाःगु दु । तालिवानं अफगान सत्ता कब्जा यात धाःसा हानं कट्टरपन्थी शासन वइ धकाः सकलें ग्यानाच्वंगु दु ।