दरवारमार्गय् स्वनिगःया बस्ती व जात्राया किपा ब्वज्या
येँ (नेपालभाषा टाइम्स) – थनया दरवारमार्गय् च्वंगु ग्यालरी १०८ य् स्वनिगःया ऐतिहासिक बस्ती व जात्रा सम्बन्धी चित्रकला ब्वज्या शुरु जूगु दु । कलाकार प्रदीपकुमार वज्राचार्यया ‘उत्सव : इन द रिदम अफ द जात्रा’ या नामं याकः चित्रकला ब्वज्या शुरु जूगु खः ।
साउन ८ गतेनिसें न्ह्याःगु कलाकार वज्राचार्यया चित्रकला ब्वज्याय् स्वनिगःया थीथी ऐतिहासिक बस्तीतलिसें स्वनिगःया दकलय् ताःहाकःगु बुंगद्यःया जात्रा, जनबहाः द्यःया जात्रा, बुंगद्यःया भोटो जात्रा, मध्यपुर थिमिया भुइसिन्हः जात्रालिसें मेमेगु नं ऐतिहासिक जात्राया चित्रकला ब्वज्या जुइगु ग्यालरी १०८ जानकारी बिउगु दु ।
कलाकार वज्राचार्यं थुपिं चित्रकलाय् जात्रा जक मखसे जात्राय् थ्वइगु धिमे बाजंया सः, हुलमुलया सः, म्येँ, रंग, भक्ततय्त श्रद्धा व सतकय् खने दइगु जात्राया उर्जायात क्यानभासय् कीगु कुतः यानादीगु दु ।
कलाकार वज्राचार्यं वर्गाकार शैलीइ तयार यानादीगु दक्वं चित्रया दक्वं श्रृंखलाय् लय, सामञ्जस्यता व अन्तर्सम्बन्धया सिजना यानागु खँ कनादीगु दु । थुकथं हे थुगु ब्वज्यां नेपाःया जीवन्त संस्कृति व सांस्कृतिक सम्पदा संरक्षणय् बः बीगु विश्वास याःगु दु ।
थुगु ब्वज्यां स्वनिगःया मूर्त व अमूर्त सांस्कृतिक सम्पदाया संरक्षणय् नं योगदान बीगु, ऐतिहासिक बस्ती व जात्रा सम्पदाया सन्देश न्यंकेत नं ग्वाहालि जुइगु ग्यालरीया संस्थापक सुगत शाक्यं कनादिल ।
भदौ ७ गते लछितक न्ह्याइगु चित्रकाल ब्वज्याया झ्वलय् संस्कृति, सांस्कृतिक व म्हसीकालिसें जीवन्त सम्पदा बारे ब्वज्याया बहस सिर्जना याइगु नं धाःगु दु ।
LEAVE YOUR COMMENTS