पारपाचुकेत ६४ करोड डलर पुलेत आदेश

सियोल – दक्षिण कोरियाया छगू उच्च अदालतं पारपाचुकेया मुद्दाय् ६४ गू करोड अमेरिकी डलर भुक्तानी यायेत आदेश बिउगु दु । अदालतं कृत्रिम बौद्धिकता (एआई) चिप उद्योगया प्रभावशाली व्यवसायी लिसें एसके समूहया अध्यक्ष चे ताए विनयात पारपाचुके मुद्दाय् थः न्हापायाम्ह कधलाः रोह सोह योङयात ६४ गू करोड ४० गू लख अमेरिकी डलर (गुंगू खर्ब ४४ गू अर्ब बोन) भुक्तानी यायेत आदेश बिउगु खः ।

उच्च अदालतं उकथंया आदेश बिउसां निगुलिं पक्षयात सर्वोच्च अदालतय् हाकनं अपिल यायेगु अधिकार दुगुलिं थ्व हे फैसलायात अन्तिम धयातःगु धाःसा मदु ।

६४ दँ दुम्ह चे ताए दक्षिण कोरियाया प्रमुख औद्योगिक समूह एसके ग्रुपया अध्यक्ष खः । उगु समूह अन्तर्गत दुगु एसके हाइनिक्स मेमोरी चिप उत्पादनय् विश्वय् दकलय् न्ह्यःने लाःगु कम्पनीमध्ये छगू खः । एआई प्रविधिया तीव्र विकासलिसें थुगु कम्पनीया बजाः मू नं उल्लेख्य रुपं थहां वनाच्वंगु दु ।

सन् २०२४ य् सियोल उच्च अदालतं चे तोएयात १४ गू करोड अमेरिकी डलर पुलेमाःगु फैसला याःगु खः । उगु इलय् फैसला याःगु ध्यबा छगू अर्ब डलर स्वयां अप्वः जूगुलिं कोेरियाली संचार माध्यमय्सं उकियात ‘शताब्दीया थिकेगु पारपाचुके’या नां बिउगु खः ।

वयां लिपा चें सर्वोच्च अदालतय् अपिल याःगु खः । सर्वोच्च थ्व स्वयां न्ह्यःया फैसला पुनरावलोकन यायेत आदेश बीवं उच्च अदालतं भुक्तानीया ध्यबा क्वपाःगु खः ।