अर्बपति हिरा ब्यापारीया च्यादँ दुम्ह म्ह्याय् भिक्षुणी जुल

एजेन्सी÷ भारतय् छम्ह हिरा ब्यापारीया च्यादँ दुम्ह म्ह्याय् जैन धर्म कथं भिक्षुणी जूवंगु दु । अर्बौंया हिरा ब्यापारीया उत्तराधिकारी जुयाच्वंम्ह देवांशी संघवीं फुक्क कथंया सुखसयल त्वःताः भिक्षुणीया कठीन जीवन हंवंगु खः । छेँय् च्वनाः धाःधाःगु नयेत्वने दुम्ह, धाःधाःगु वसः पुने दुम्ह देवांशी आः तुयुगु वसः फुनाः खाली तुतिं छेँय् छेँय् चाःहिलाः भिक्षा फ्वनाः थःगु जीवन यापन यानाच्वंगु दु ।

वंगु वालय् हिरा ब्यापारी धनेश संघवी व वया कलाः अमी संघवीया निम्ह म्हयाय् मध्ये तःधिकःम्ह म्ह्याय् दिवांशी जैन धर्मकथं भिक्षुणी जूवंगु खः । भारतय् जैन धर्म माने याइपिं संघवीतय् जनसंख्या ४५ लाख दु । जैन धर्म २५०० दँ स्वयां न्ह्यः स्थापित धर्म खः । थौंकन्हय् भारतय् थथे जैन धर्मय् दुहां वनाः भिक्षु–भिक्षुणी जुइपिं ल्याः अप्वया वयाच्वंसां देवांशीं थें मचा इलय् हे भिक्षुणीया लँपु लिइगु धाःसा असामान्य जूगु खँ धाःगु दु ।

देवांशी वंगु बुधवाः गुजरातया सुरत शहरय् जैन भिक्षुभिक्षुणी व हजारौं अनुयायीतय् उपस्थितिइ दीक्षा कयाः गृहत्याग यायेगु प्रण याःगु खः । दीक्षा काःवःबलय् थः मांअबु लिसें रत्नया तिसां तियाः रेशमया वसः पुनाः, हिरा थुनातःगु मतू पुयावःम्ह देवांशी दीक्षा कायेधुंकाः सँ फुक्क चानाः तुयुगु वसः पुनाः भिक्षुणी जूवंगु खः ।

जैन धर्म थः लँय् जुइबलय् नं की छम्ह नं स्याये मजिउ धयागु मान्यता दुगु धर्म खः । उकिं आः देवांशीं थः लँय् जुइबलय् नं झुके जुयाः नं कीयात मन्हुइमा धकाः बँ पुयाः वनेत तुफि छपु नं ज्वना जुइ । आः देवांशी मेमेपिं जैन भिक्षुभिक्षुणीपिं च्वना वयाच्वंगु उपाश्रय धाःगु आश्रमय् च्वना वयाच्वंगु दु ।

संघवी धयापिं जैन धर्म दुनेया नं थज्याःगु सम्प्रदाय खः, गन मस्तय्त नं भिक्षु–भिक्षुणीया रुपय् स्वीकार याइ । देवांशीया अभिभावकपिं ‘तसकं धार्मिक’ कथं म्हसीका दुपिं खः । उमि छेँजःपिंसं धाःकथं देवांशी नं मचांनिसें हे अत्यात्मिक जीवनपाखें झुकाव दुम्ह खः । उमिगु कथं देवांशीं गुबलें नं टिभी वा संकिपा मस्वः, अले गुबलें नं मल वा रेष्टुराँय् मवं । टाइम्स अफ इडिण्याया कथं देवांशीं मचांनिसें हे न्हि स्वक्वः प्रार्थना यायेगु याना वयाच्वंगु दु, अले निदँ दुबलय् निसें हे व्रत च्वनेगु याना वयाच्वंगु दु ।

देवांशी संन्यास ग्रहण याये छन्हु न्ह्यः वया छेँजःपिंसं सुरतय् किसि, सल, गोरुगाडाय् थीथी झाँकीतयाः तःधंगु ¥याली नं पिकाःगु खः । उबलय् देवांशी व वया छेँजःपिं किसि सालाहःगु रथय् च्वनावःगु खः ।
देवांशीं संन्यास ग्रहण याःगु लसताय् मुम्बईया लिसें बेल्जियमया एन्टवर्पय् च्वनाच्वंपिं संघवी सम्प्रदायं उत्सव न्यायेकूगु खः ।

देवांशीया संन्यासयात जैन समुदाययापिंसं समर्थन याःसां अधिकारकर्मीतय्सं धाःसा मचा अधिकारया हनन जूगु धासें कुंखिउँगु दु । अधिकारकर्मीतय्सं मचां संन्यासी जुइ धकाः सहमति हे बिउसां कानुनी सहमति जुइमखु धाःगु दु । कानुनी रुपं थःम्हं थःगु बारे निर्णय यायेफइ धयागु १८ दँ दयेधुंकाः जुइ धासें उमिसं देवांशीं संन्यास काःगु निर्णय वया मांअबुपिंसं याःगु निर्णय जूगु व थुकिं वयागु हित दु कि मदु धयागु बिचाः मयाः धयाच्वंगु दु ।

‘थज्याःगु निर्णयं मचायात शिक्षा व मनोरञ्जनं बञ्चित यात धाःसा थ्व अधिकारया उल्लंघन खः’ छम्ह अधिकारकर्मीं धाःगु दु ।

तर मुम्बई विश्वविद्यालयय् जैन दर्शन ब्यंका वयाच्वंम्ह डा. विपिन दोषीं धाःगु दु, ‘देवांशी परम्परागत मनोरञ्जनपाखें बञ्चित जुइफु, तर छु थ्व धाथें दक्वसितं माः हे धयागु दु ला ? व प्रेम व शिक्षापाखें बञ्चित जुइ धयागु खँय् जि सहमत मदु । वं थः गुरुया माया चूलाकी, अले इमान्दार जुयाः असंलग्न जुइगु सयेकी । थ्व छु झन् बांलाःगु खँ मखुला ?’

यदि देवांशी लिपा थःगु बिचाः हिलाः भिक्षुणी जीवन त्याग यानाः पुलांगु जीवनय् लिहां वये चाहे जूसा वयेफइ धाःगु दु । भाररतय् सन् २००९ य् छम्ह २१ दँ दुम्ह जैन भिक्षुणी आश्रमं बिसिउँ वयाः थः प्रेमीलिसे ब्याहा याःगु खः । व नं गुदँ दुबलय् हे भिक्षुणी जूवंम्ह खः ।