ने. सं. ११४४ कौलाथ्व पारू - नःलास्वनेगु

रुसपाखें युक्रेनयात वार्ताया प्रस्ताव

एजेन्सी- रुसं युक्रेनयात वार्ताया प्रस्ताव तःगु दु । रुसया राष्ट्रपति भ्लादिमिर पुटिनया प्रवक्ता दिमित्री पेसकोवं आइतवाः मस्कोय् पत्रकारतय्त रुसया प्रतिनिधि मण्डलं युक्रेनलिसे वार्ता यायेत बेलारुसया गोमेलय् वंगु धाःगु खः । तर युक्रेनया राष्ट्रपति भोलोदिमिर जेलेन्स्कीं बेलारुसया भूमिइ रुसलिसे वार्ता यायेत अस्वीकार याःगु दु । जेलेन्स्कीं बेलारुसया भुभागं युक्रेनय् आक्रमण मजूगु खःसा मिन्स्कय् वार्ता जुइफइगु खः तर आः अथे जुइफइमखु धाःगु खः ।

जेलेन्स्की धाःगु दु ,‘जिमित शान्ति माःगु दु, जिपि नापलायेत तयार दु, जिमिसं युद्धया अन्त चाहे जुया ।’ जेलेन्स्कीं वार्सा, ब्रटिस्लाभा, बुडापेस्ट, इस्तानबुल, बाकु आादि सहरय् वार्ता यायेत प्रस्ताव तसें धाःगु दु ‘युक्रेनय् क्षेप्यास्त्र प्रहार मयाःगु मेगु शहर वार्ताया थाय् जुइफइ, थ्व जक इमानदारितापूर्वक वार्ता यायेगु व युद्धया अन्तया लँ खः ।’

युक्रेन व रुस दथुइ युद्ध जूगु प्यन्हुया न्हिकन्हु रुसया सेना युक्रेनया निगूगु तःधंगु शहर खार्किभय् प्रवेश याःगु दु । स्थानीय अधिकारीतय्सं बिउगु जानकारीकथं सैन्य सवारीसहितया रुसी सेना खार्किभय् दुहां वःगु खः । खार्किभया अधिकारीतय्सं अन दुपिं नागरिकतय्त छेँ नं पिहां वयेत इनाप याःगु दु । थ्व शहरया जनसंख्या १५ लाख दु ।

युक्रेनया सञ्चार माध्यमतय्सं बिउगु जानकारीकथं रुसी सेनां युक्रेनया दक्षिणी शहर नोभा काखोभ्कायात कब्जाय् काःगु दु । क्राइमिया नापसं लाःगु चिकिचाधंगु थ्व सहर रणनीतिक रुपं महत्वपूर्ण शहर खः । सी सेनां सहरया प्रमुख सरकारी भवन नियन्त्रणय् कयाः रुसी ध्वाँय् ब्वयेकूगु खः । राजधानी किभय् नं विस्फोट जुयाच्वंगु दिउगु मदुनि ।

अथेहे रुसी सेनां युक्रेनया चिकंया खानी, ग्याँस पाइपलाइनय् आक्रमण याःगु दु । बिबिसीं बिउगु जानकारीकथं सेनां वासिलकिभ आयल टर्मिनलय् मिसाइल प्रहार याःगु खः । अथेहे युक्रेनया रोभेंकी शहरय् च्वंगु आयल टर्मिनलय् नं हमला जूगु दु । रुसी सेनां खार्किभय् च्वंगु ग्याँस पाइपलाइनयात नं ध्वस्त याःगु खः ।