परमाणु आक्रमण जुल धाःसा गन सू वनी राष्ट्रपति ट्रम्प ?

एजेन्सी- यदि धाथें अमेरिकाय् परमाणु आक्रमणया खतरा जुल धाःसा अमेरिकी राष्ट्रपति डोनाल्ड ट्रम्पयात गन यंकीगु जुइ ? पुलांम्ह राष्ट्रपति ट्रुम्यान लिसें ट्रम्प तक न्ह्याम्ह राष्ट्रपति जूसां उमिग सुरक्षाया निंतिं बंकरय् च्वनेगु सुविधा दु ।

परमाणु आक्रमणया खतरा खनेदयेवं राष्ट्रपति ट्रम्पयात छगू सुरक्षित थासय् यंकी । थुकिया निंतिं छगू बंकर ह्वाइट हाउसया क्वय् हे दु, गुगु सन् १९५० य् दयेकूगु खः । अथेहे मेगु बंकर भर्जिनियाया ब्लु रिज माउन्टेनया माउन्ट विदर नांया पहाड च्वय् दयेकातःगु दु । अथेहे अमेरिकी नेभीं ‘पीनट आइल्यान्ड’ नामं छगू बंकर अमेरिकी राष्ट्रपति जोन एफ केनेडीया निंतिं दयेकातःगु दु । थ्व बंकर फ्लोरिडाया पाम बीच हाउस लिक्कसं लाः, गन केनेडी अप्वः थें वनेगु याः । पाम बीच हाउस व बंकरया दूरी मुक्कं १० मिनेट ति जक दु ।

पीनट आइल्यान्डया ब‌कर

थ्व बंकरयात ‘डिटेचमेन्ट होटल’ नं धायेगु याः, गुकियात दयेकेत उबलय् ९७ हजार अमेरिकी डलर खर्च याःगु खः । ट्रम्पयाके थःगु हे छगू बंकर नं दु, गुगु फ्लोरिडाय् ‘मार ए लागो’ नांया वयागु निजी थासय् दु । राष्ट्रपतिया निंतिं धकाः सरकारं दयेकातःगु स्वंगू बंकर दु । छगू पीनट आइल्यान्ड, ह्वाइट हाउसय् च्वंगु बंकर व मेगु माउन्ट विदरय् च्वंगु बंकर । पीन आइल्यान्डय् राष्ट्रपतिया लिसें वया छगू दर्जन ग्वाहालिमि व सेक्रेटरीत च्वनेफइ । थ्व बंकर स्वीम्ह मनूत च्वनेगु थाय् दु ।

९/११या आक्रमणया इलय् अमेरिकी उपराष्ट्रपति डिक चेनी ह्वाइट हाउसय् च्वंगु बंकरय् च्वनाः ज्या याःगु खः । अन वया कलाः, राष्ट्रिय सुरक्षा सल्लाहकार कोंडोलीजा राइस, रक्षा सचिव डोनाल्ड रम्सफील्ड लिसें खुम्हे मेपिं मनूत च्वःगु खः । उबलय् तत्कालिन राष्ट्रपति जर्ज बुशयात धाःसा एयर फोर्स वनय् तयेयंकूगु खः ।
अथेहे अमेरिकी कंग्रेसया सदस्यतय् निंतिं पश्चिमी भर्जिनियाय् ह्वाइट सल्फर स्प्रिंग्स लिक्कसं ग्रीनब्रायर रिसोर्टय् छगू बंकर दयेकातःगु दु । थ्व बंकरया नां प्रोजेक्ट ग्रीक आइल्यान्ड जुयाच्वंगु खः । अले दशकौं तक थुकिया छ्यलाबुला नं जूगु खः । तर सन् १९९२ य् थ्व बंकर बन्द यायेधुंकाः जक थज्याःगु नं बंकर दु धयागु खँ सार्वजनिक जूगु खः ।

क‌ग्रेस दुजःतय् नि‍ति‍ दयेकातःगु ब‍कर

भर्जिनियाया ब्लुमाउन्टय् लिक्क लाःगु १७५४ फिटया माउन्ट विदरयात शिखरयात हे राष्ट्रपति व वया ग्वाहालिमिपिनिगु निंतिं छगू बंकर कथं दयेकाबिउगु खः ।
माउन्ट विदरया सुरक्षा अमेरिकी फेडरल इमजेन्सी म्यानजमेन्ट एजेन्सी (फेमां) याइ । थ्व बंकर सन् २००१ य् अल कायदां याःगु आक्रमण लिपा संचालनय् हःगु खः धाइ । फेमाया निर्देशकं सन् २००१ इा अक्टोवरय् थुकिया जानकारी कंग्रेसय् बिउगु खः । तर थ्व स्वयां न्हयः गुबलय् थ्व बंकर दयेकूगु धयागु खँ धाःसा छुं जानकारी मबिउ ।

ट्रम्पया जग्गाय् च्वंगु मार ए लागो बंकर निसें माउन्ट वेदर, पीनट आइल्यान्ड फुक्कं शीत युद्धया इलय् दयेकूगु धाइ । मार ए लागोया बंकर सन् १९५० य् छम्ह धनीम्ह मिसा मर्जरी मेरीवेदर पोस्टं दयेकूगु खः धाइ । पोस्टं कोरियालिसे युद्ध जुइगु आशंकाय् थः सुलेत बंकर दयेकूगु धाइ । ट्रम्पं थ्व थाय् सन् १९८५ य् न्यानाकाःगु खः ।