चीन-भारतया सेना दथुइ सिक्किमया सीमाय सामान्य झडप
एजेन्सी – चीन व भारतया सेना दथुइ मेगु छगू सीमा लागाय् झडप जूगु समाचार सार्वजनिक जूगु दु । भारतीय संचारमाध्यमतय्सं स्वन्हु न्ह्यव सिक्किमय् लाःगु सीमाय् थ्व झडप जूगु खँ धाःगु दु । भारतीय सेनां नं नाकुला धाःगु थासय् निगू देय्या सेना दथुइ सामान्य झडप जूगु पुष्टि याःगु दु ।
निगू देय् दथुइ जूगु झडपया खँ सार्वजनिक जुइवं भारतीय सेनां छगू वक्तव्य पिथँसें धाःगु दु, ‘उत्तर सिक्किमया नाकुला धाःगु थासय् २० जनवरीइ भारतीय सेना व पिपुल्स लिवरेशन आर्मी दथुइ सामान्य झडप जूगु व थ्व मामिला स्थानीय कमान्डर तय् नियम कथं ज्यंके नं धुंकूगु दु ।’ सेनां संचार माध्यमतय्त थ्व घटनाया तथ्ययात स्यंका समाचार मबीत नं धाःगु दु ।
थ्वयां न्ह्यः भारतीय सञ्चार माध्यमतय्सं थ्व झडपय् निगुलिं देय्या छुं सैनिकत घाःपाः जूगु खँ धाःगु खः । उत्तर सिक्किमया नाकुला सीमाय् चिनिया सैनिकत सीमा पार यानाः भारतपाखे वयाच्वंगु इलय् थ्व झडप जूगु खँ भारतीय सञ्चार माध्यमतय्सं च्वःगु दु । भारतीय सञ्चार माध्यमतय्सं थ्व झडपय् २० म्ह चिनिया सैनिक व प्यम्ह भारतीय सैनिक घाःपाः जूगु खँ धयाच्वंगु दु ।
मेखे चीन सरकार समर्थित समाचार वेबसाइट ग्लोबल टाइम्सं धाःसा भारतीय सञ्चारमाध्यमय् वःकथं चिनिया सैनिक घाःपाः जूगु खँयात अस्वीकार याःगु दु । ग्लोबल टाइम्सं च्वःगु दु, ‘भारत-चीन सीमाय् जूगु झडपय् २०म्ह चिनियाँ सैनिक घाःपाः जुल धकाः वःगु समाचार सरासर गलत खः ।’
छुं ला न्ह्यः उत्तरी लद्दाखया गलवान घाटीइ जूगु झडपय् धाःसा नीम्ह भारतीय सेना सीगु खः । २०२० जुन १५ य् जूगु थ्व झडप लिपा निगू देय् या सेना दथुइ थीथी थासय् तनाव खने हे दयाच्वंगु दनि । लद्दाखय् चीनं प्यम्ह भारतीय सैन्य अधिकारी व खुम्ह जवानतय्त नं कब्जाय् काःगु खःसा लिपा उमित त्वःता बीधुंकूगु दु ।
LEAVE YOUR COMMENTS