कोरियाली प्रायद्वीपय् याकनं तनाव क्वचाइगु इनया विश्वास

दक्षिण कोरियाली राष्ट्रपति मू जे इनं कोरियाली प्रायद्वीपय् याकनं हे तनाव क्वचाइगु खँ धयादीगु दु । बिबिसी लिसे अन्तर्वार्ता बिइगु झ्वलय् राष्ट्रपति इनं अमेरिका व उत्तर कोरियालीया कुतलं याकनं हे कोरयाली प्रायद्वीपय तनाव खतम जुइफइगु खँ धयादीगु खः ।

उत्तर व दक्षिण कोरिया दथुइ सन् १९५३ य् युद्ध क्वचायेधुंकूगु खः, तर निगू देय् दथुइ अझ नं शान्ति सम्झौता जूगु मदुनि ।अथेहे मुन जे इनं उत्तर कोरियाली नेता किम जोंग उनयात परमाणु हतियार त्वतेत स्वीकार याकेगु निंतिं लगातार कुतः जुयाच्वंगु खँ नं धयादीगु दु । थ्व झ्वलय् वय्कलं उत्तर कोरियाली नेता उन छम्ह सरल व्यक्ति जूगु खँ नं धयादीगु दु ।

अन्तर्वार्ताया झ्वलय् वय्कलं अमेरिकी राष्ट्रपति व उत्तर कोरियाली नेता दथुइ जुइगु वार्ताया झ्वलय् कुटनीतिक समस्या वयेफु धयादिसें यदि थथे जुल धाःसा युरोपेली देय्या नेतातय्सं मध्यस्थता याइगु खँ नं धयादीगु दु ।

निगू परम्परागत दुश्मन देय्तय् नेतात मुन जे इन व किम जोंग उन दथुइ थ्व दँय् जक स्वक्व वार्ता जुइधुंकूगु दु । दक्षिण कोरियाली राष्ट्रपति इनं किम व डोनाल्ड ट्रम्प दथुइ वार्ताया निंतिं मध्यस्थकर्ताया भूमिका नं म्हिता वयाच्वंगु दु ।