खड्गी समाजया मिसा विभाग नीस्वन
येँ (नेपालभाषा टाइम्स) – नेपाल राष्ट्रिय खड्गी समाज येँ जिल्ला समितिया मिसा विभाग नीस्वंगु दु । थनया न्हूसतकय् च्वंगु येँ महानगरपालिकाया सांस्कृतिक छेँय् जूगु छगू मुँज्यां समाजया येँ जिल्लाया मिसा विभाग नीस्वंगु खः ।
येँ जिल्ला नायः पुष्पराज शाहीया सभापतित्वय् जूगु ज्याझ्वलय् मूपाहां समाजया केन्द्रीय नायः नन्दकिशोर शाहीं त्वाःदेवाय् मत च्याकाः उलेज्या यानादीगु खः ।
उगु मुँज्यां येँ जिल्ला दुजः सपना शाहीया संयोजकत्वय् अनु शाही, विनिता शाही, पेमा तण्डुकार शाही, दिना शाही लगायत नीन्ह्यम्हेसिया मिसा विभाग नीस्वंगु दु ।
मूपाहां केन्द्रीय नायः शाहीं मिसा विभागया न्हूगु ज्यासना पुचःयात भिंतुना बियादिसेंं समाजं बिउगु जिम्मेवारी पूवंकेगु, समाजयात च्वन्ह्याकेगु, समुदायया संस्कृति हे पहिचान खः धासें मिसातय् उपस्थिति मदयेक संगठन पूवनीमखु धयादिल ।
केन्द्रीय दुजः नापं ल्याय्म्ह विभागया कजि विक्रम खड्गीं समाज न्ह्याकेत ल्याय्म्हत मदयेकं मगाः धासें अग्रजपिंसं न्हू पुस्तायात कःघाना मयंकूग खँय् च्यूता प्वंकादिल । लिसें सकलें जाना छुं नं छुं ज्या यानाः क्येनेमाःगु नं वय्कलं धयादिल।
नुगःखँ तयेगु झ्वलय् यलमनपा १९ वडा दुजः निर्मला खड्गीं मिसात धइपिं छेँ दुने जक लिकुना च्वने मजिउ धासें छु यायेगु निंतिं छेँनं पिने वयाः थःगु क्षमता क्यने फयेकेमाः धयादिल ।
येँमनपा २२ वडा दुजःलिसें कार्यपालिकाया दुजः ललिता खड्गीं येँ जिल्ला समिति मिसा विभागयात सामाजिक समितिपाखें माःगु व फूचाःगु ग्वहालिया निंतिं न्ह्याबलें सकारात्मक दु धयादिल ।
केन्द्रीय छ्याञ्जे मिलन खड्गी विभाग नीस्वनेगु ताःई न्ह्यःनिसेंया योजना बल्ल पूवंगु खँय् लसता प्वंकादिल । मुँज्यानायः पुष्पराज खड्गीं विभागया ज्यासना पुचःयात भिंतुना बिसें थुगु विभागं थःपिनिगु उत्तरदायी व जिम्मेवारी पूवंकीगु विश्वास प्वंकादिल ।
LEAVE YOUR COMMENTS