आः न्हूगु कोरोना केन्द्र अमेरिका : ८० हजार मनू सी फइगु अनुमान

येँ – विश्वय् न्यना वनाच्वंगु कोरोना भाइरसया न्हूगु इपिसेन्टर आः अमेरिका जूगु दु । अमेरिकाया जोन हप्किन्स युनिभर्सिटीं म्हिगः पित बिउगु न्हूगु तथ्यांक कथं अमेरिकाय् आः कोरोना संक्रमित विरामीतय् ल्याः ८५,०० थ्यंगु दु गुगु विश्वय् हे दकलय् अप्वः खः ।

चीनय् संक्रमितया ल्या ८१,७८२ थ्यंगु खःसा इटालीइ ८०,५८९ थ्यनाच्वंगु दु । अथे खःसां चीनय् सीपिनि ल्याः धाःसा चीन व इटालीइ सिबें कम दु । चीनय् सीपिनि ल्याः ३२९१ खःसा इटालीइ ८२१५ थ्यनाच्वंगु दु । अमेरिकाय् धाःसा १३०० जक सीगु दु ।

तर स्वास्थ्यकर्मीतय्सं यानातःगु अनुमान कथं अमेरिकां कोरोनाया मृत्युदरय् नं मेपिं सकसितं त्याकीगु सम्भावना प्रवल दु । अमेरिकाय् कोराना संक्रमणं कयाः ८०,००० मनूया ज्यान वनीगु अनुमान जुयाच्वंगु दु । अन छन्हुया दुने हे छक्वलं १७ हजारया ल्याखं संक्रमित अप्वःगु खः । आः वइगु अप्रिल महिनाय् अन न्हिं २३०० म्ह तक मनू सी फइगु अनुमान समेत यानातःगु दु ।

स्थिति थज्याःगु खःसां अमेरिकी राष्ट्रपति डोनाल्ड ट्रम्पं देशय् लकडाउन खुल्ला यानाः मनूतय्त ज्याय् लगे यायेगु बिचाः समेत सार्वजनिक यानादीगु दु । आः वइगु अप्रिल १२ कुन्हु इस्टर नखःया लसताय् लाकाः अमेरिका खुले यायेगु वय्कःया योजना दु । तर उकियात अनया आपालं मनूतय्सं धाःसा विरोध याःगु दु । अमेरिकी संविधान कथं जनस्वास्थ्य सम्बन्धी निर्णय यायेगु अधिकार अनया राज्यतय्त बियातःगु जुयाः राष्ट्रपतिं धाःसां अमेरिका तत्काल खुले जुइगु सम्भावना धाःसा खने मदुनि ।

(स्रोत : बीबीसी न्यूज सर्भिस)

मुख्य केन्द्र न्यूयोर्क गन नेपाःमि यक्व दु
थौंकन्हय् अमेरिकाया ५० गुलिं राज्यय् संक्रमितत लुया वःगु दु । उकी मध्ये नं केन्द्र धाःसा न्यूयोर्क जुयाच्वंगु दु । अमेरिकाया कुल संक्रमितया करिब बछि न्यूयोर्कय् दु । उकिसनं अनया क्वीन्स व ज्याक्सन हाइटय् दकलय् अप्वः संक्रमित लूगु दु । थ्व थासय् नेपाःमितय् ल्याः नं अप्वः दु । न्यूयोर्कया थीथी अस्पतालय् कोरोना संक्रमित न्याम्ह नेपाःमि वासः यानाच्वंगु दुसा छम्ह सीधुंकूगु दु । अन च्वंपिं नेपाःमितय्सं संक्रमित नेपाःमितय् ल्याः अझ यक्व दयेमाः धकाः अनुमान याःगु दु ।

(ने. सं. ११४० चौलाथ्व ३ / वि. सं २०७६ चैत १४, शुक्रवाः)

सम्बन्धित बुखँ

LEAVE YOUR COMMENTS