कतारय् कासामितय्सं प्रदर्शन याइगु जुइवं फुटबलय् जक ध्यान बिइत फिफाया इनाप

एजेन्सी÷ कतारय् निवाः लिपा जुइत्यंगु फिफा विश्वकप २०२२य् कासामितय्सं शान्तिपूर्ण विरोध प्रदर्शनया तयारी यानाच्वंगु दु । समलिङ्गी सम्बन्ध, मानवअधिकार व आप्रवासी ज्यामितय्त याइगु व्यवहारयात कयाः कतारया अलोचना जुयाच्वंगु अवस्थाय् विश्वकपय् ब्वति काइगु देय्या कासामितय्सं थुकियात कयाः शान्तिपूर्ण विरोध यायेत्यंगु खः ।

थ्व हे झ्वलय् फिफां थुगसी विश्वकपय् थ्यंगु ३२ गू टिमयात पौ छ्वयाः फुटबलय् जक ध्यान बिइत इनाप याःगु दु । फिफाया अध्यक्ष जियानी इन्फान्टिनो व महासचिव फात्मा समौरां हस्ताक्षर याना छ्वःगु पतिइ धयातःगु दु ‘पृष्ठभुमि, धर्म, लिङ्ग, यौन झुकाव वा राष्ट्रियताया मतलब मयासे सकसितं लसकुस दु ।’

विश्वय् यक्व हे राजनीतिक समस्या व चुनौती दुगु व उकियात फुटबललिसे मस्वायेत पतिइ इनाप यानातःगु दु । विश्वकपया उद्देश्य दक्व धर्म, लिङ्ग व राष्ट्रियतायात स्वायेगु नं खः धकाः पतिइ धयातःगु दु ।

विश्वकपय् शान्तिपूर्ण विरोध यायेगु झ्वलय् युरोपपाखें छनोट जूगु देय्या कप्तानतय्सं ‘वन लभ’ (समलिङ्गी सम्बन्ध) आर्मब्यान्ड तयेगु धकाः धाःगु दुसा डेनमार्कं ‘टोन्ड डाउन जर्सी’ (शोकया संकेत याइगु) पुनीगु धाःगु दु ।