वैश्विक तनावया लिच्वः बांलाइमखु

एजेन्सी- चिनियाँ राष्ट्रपति शी जिनपिङ्ग वैश्विक ल्वापुया लिच्वः तसकं ग्यानापुइगु ख्याच्वः बियादीगु दु । डावोस वल्र्ड इकोनोमिक फोरमया सोमवाः जूगु बैठकय् न्ववासें राष्ट्रपति जिनपिङ्गं थ्व ख्याच्वः बियादीगु खः ।

कोरोना महामारीया कारणं थ्व बैठक भर्चुअल माध्यमं जुयाच्वंगु दु । भर्चुअल बैठकय् न्ववासें राष्ट्रपति जिनपिङ्गं ल्वापु समस्याया समाधान जुइमखु धयागु इतिहासं प्रमाणित यानाच्वंगु दु धासें कोरोना नियन्त्रणया निंतिं मंकाः कुतः याये आवश्यक दुगु खँ धयादीगु दु । विश्वया प्रमुख शक्तितय् दथुया स्वापू स्यना वनाच्वंगुयात संकेत यासें वय्कलं भविष्ययात स्वयेमाःगु खँ धयादीगु खः ।

अथेहे वय्कलं विश्वन्यंकंया अर्थव्यवस्था स्यनीगु पाखें पनेगु निंतिं आर्थिक नीतिया खँय् बांलाक समन्वय यायेत नं आह्वान यानादीगु दु । थ्व झ्वलय् वय्कलं कोरोना महामारीयात नियन्त्रण यायेत चीन सफल जूगु खँ नं न्ह्यथँसें महामारीया इलय् नं अर्थव्यवस्था बल्लाःगु चीन विश्वया छगू जक देय् जूगु दावी नं याःगु खः ।

वय्कलं ख्याच्वः बिइगु भासं समृद्ध देय्तय्सं थःपिनिगु गतिविधिया कारणं विकासशील देय्तय्त जुइग समस्यायात ध्यानय् तयाः जिम्मेवार आर्थिक नीति नालेमाःगु खँ धाःगु खः ।

राष्ट्रपति जिनपिङ्गं चीनं सुरु निसें हे कोरोना शून्य नीति नाला वयाच्वंगु व थुकिं यानाः पिनेयापिनिगु निंतिं सीमा बन्द जुयाच्वंसां महामारीया इलय् विश्वया निंतिं हे उत्पादनया केन्द्र जूगु खँ नं धयादिल । थ्व झ्वलय् वय्कलं विश्वय् सलंसः दँय् छक्वः वइगु महामारीया विरुद्ध तसकं कठीन लडाइ ल्वानागु खँ नं धाःगु खः ।

लिसें जिनपिङ्गं थ्व महामारी ताःई तकः न्ह्याइगु, भाइरसया न्हूगु भेरियन्ट न्हापाया तुलनाय् अझ तेज गतिं न्यना वनाच्वुंलिं विश्वया अर्थव्यवस्थाय् झन तःधंगु हाथ्या वयाच्वंगु खँ नं धाःगु दु । ‘विश्वया आयात निर्यातया ज्याय् पंगः वयाच्वंगु दु, गुकिं यानाः भाः थहां वनाच्वंगु दु, ऊर्जा आपूर्ति नं लिच्वः लानाच्वंगु दु’ जिनपिङ्गं धाःगु दु ।

चीन व अमेरिका दथुइ राजनीतिक व व्यावसायिक तनाव अप्वया वनाच्वंगु इलय् राष्ट्रपति जिनपिङ्ग वल्र्ड इकोनोमि फोरमय् सम्बोधन यायेगु झ्वलय् धाःगु दु, ‘संरक्षणवाद व थः यःयःथे ज्या यानां सुयातं बांलाइमखु । थुकिं अन्तय् थःथवय् नोक्सान जुइगु खः । उकिं झीसं छुं ल्वापुख्यापु मदयेकः वार्ताया माध्यमं न्ह्याः वनेमाः ।’

स्वीटजरल्यान्डया डोवोस शहरय् दँय्दँस जनवरीइ जुइगु वल्र्ड इकोनोमिकि फोरमया बैठकय् विश्वन्यंकं व्यवसायी व राजनीतिक व्यक्तित्वपिं मुनीगु खः । तर कोरोना महामारीया कारणं थुगुसी नं थ्व बैठकं भर्चुअल माध्यमं सीमित जूगु दु ।