सिँल्यंसतःया पसः कवः बालं बीगु खँय् विवाद
येँ – मरुया सिँल्यंसतः (सिंहसतः) दयेकेगु ज्या क्वचायेकाःलि पसःकवः बालं बीत टेन्डर आह्वान यानाः नं टेन्डर लाःपिंत पसः मबिउ धासें सम्बन्धित मनूतय्सं विरोध याःगु दु ।महानगरपालिका व गुथि संस्थान दथुइ ब्वलंगु विवादं यानाः थःपिंत इलय् पसः कवः मबिउगु द्वपं टेन्डर लाकूम्ह ओमकृष्ण श्रेष्ठं बियादीगु दु । वय्कलं मनपा व गुथिया विवादं थःपिंसं ज्या नं याये मफुगु धासें थुकिं यानाः ब्याज पुलाः हया तयागु थःपिनिगु धरौटी ध्यबा अथें लानाच्वंगुलिं खँ कनादिल ।
अथेहे मेम्ह टेन्डर लाकूम्ह स्थानीय बिष्णुराज श्रेष्ठं नं गुथि संस्थानं इलय् निर्णय मयाःगुलिं थःपिंत समस्या जुयाच्वंगु खँ कनादिल । वय्कलं धयादी, ‘पसः बीगु खः वा मखु धइगु खँय् याकनं निर्णय याःसा जिउ ।’मेखे २० वडाया वडाध्यक्ष राजेन्द्र मानन्धरया धापू धाःसां बिस्कं दु । वय्कःया कथं सिँल्यंसतःयात व्यापारिक थाय् दयेकेगु मखुसें टुरिष्ट इन्फर्मेसन सेन्टर दयेकेगु ग्वसाः जुयाच्वंगु दु ।
विश्व सम्पदा लागाय् लाःगु थाय् जूगुलिं थुगु थाय्यात टुरिष्ट इन्फर्मेसन सेन्टर दयेकेमाः धकाः थःपिंसं न्हापा हे गुथि संस्थानयात पौ च्वयागु खँ धासें वय्कलं अन गुलि बाः वइगु खः व मनपां पुलेत तयार दुगु तर गुथि संस्थानया कर्मचारीतय्सं थुकी वास्ता मयाःगु द्वपं बियादिल । गुथि संस्थानया प्रवक्ता सरोज थपलियां धाःसा थःपिंसं टेन्डर आह्वान यायेधुंकाः जक मनपां अन इन्फर्मेसन सेन्टर तयेगु धकाः पौ च्वया हःगुलिं व्यावहारिक समस्या वःगु खँ कनादिल ।
वय्कलं पसः बालं काःपिं व्यापारीत हथाय्चाःगु धासें टेन्डर प्रक्रियाया निंतिं ई हे ९० न्हुया ई काःगु व टेन्डर प्रक्रियाय् वनेधुंकाः गुथि संस्थानया अध्यक्ष व प्रशासन निम्हेसियां म्याद फूगुलिं यानाः निर्णय याये मफयाच्वंगु खँ कनादिल । वय्कलं न्ह्यःने धयादी, ‘आः न्हूम्ह अध्यक्ष नं वयेधुंकूगु दुसा प्रशासक नं न्हूम्ह वयेधुंकूगु दु । आः सञ्चालक समितिया बैठक च्वनाः याकनं निर्णय यायेगु जुइ ।’
२० वडाया अध्यक्ष मानन्धरं धाःसा गुथि संस्थानं मनपायात सतः बी चाहे मजूगु द्वपं बियादीगु दु । वय्कलं धयादी, ‘व्यापारीयात बिल धाःसा ध्यबा नये दइ, मनपायात बिल धाःसा ध्यबा नये दइ मखु । उकिं गुथिया कर्मचारीतय्सं मनपायात वेवास्ता यानाच्वंगु खः ।’ वय्कलं मरु लागाय् खुल्ला थाय् माःगु खँ धयादिसें चलन चल्तीया भावं थःपिंसं गुथियात बाः बी धयां नं आलताल यानाच्वंगु खँ कनादिल ।
प्रवक्ता थपलियां धाःसा गुथि संस्थानयात आः सरकारं छुं हे कथंया बजेट व्यवस्था मयाःगुलिं थःपिंसं सतः बालं बीत्यनागु खँ कनादिल । वय्कलं धयादिल, ‘उलिमछि जात्रा पर्व चले यायेमाः गुथि संस्थानया थःगु हे छुं आम्दानी मदु, गुथि चले यायेगु खःसां नं थःगु आम्दानीया स्रोत नं दयेकेमाः । अथे जुयाः बालं बीत्यनागु खः ।
’वय्कलं धयादी, ‘हनुमानध्वाखा लागाया फुक्कं सम्पत्ति गुथि संस्थानया हे खः तर अन मनपां पर्यटकयाके ध्यबा म्हयेगु यानाच्वंगु दु ।उकिया छुं प्रतिशत गुथि संस्थानयात नं बीमाःगु माग यानागु खः । तर मनपां वास्ता यानाच्वंगु मदु । गन तक सतः दयेकेगु झ्वलय् मनपां ४० प्रतिशत ध्यबा तःगु दु अन ध्यबा म्हयेगु ज्या याःम्हेसिनं छुं छुं दायित्व ला कुबी माःगु हे जुल ।’
वडाध्यक्ष मानन्धरं मनपां पौ च्वयाः हे गुलि बाः क्वःछिनागु खः उगु बाः थःपिंसं पुलेत तयार दु धयाबलय् गुथि संस्थानं नं पौया लिसः बीगु झ्वलय् मनपायात बीत तयार दु धकाः धाःसां सम्झौता यायेगु ज्या धाःसा मजुयाच्वंगु खँ कनादिल । वय्कलं धयादी, ‘सम्झौता यायेगु ज्याय् गुथि संस्थानं आलताल यानाच्वंगु दु ।’सिँल्यंसतलय् थौंकन्हय् १५ क्वः पसः कवः दु । थ्व फुक्कंया लय् ४ लाख ८३ हजार दामं टेण्डर बिउगु खः । न्हापा थनं १ लाख ५ हजार तका जक बाः वयाच्वंगु खः ।
LEAVE YOUR COMMENTS