रास्वपाया मन्त्री निसें सांसदतय्त प्रशिक्षण बीमाः
राष्ट्रिय स्वतन्त्र पार्टीया सांसदत जनतायात ज्या क्यनेगु निंतिं हथाय् चायाच्वंगु जक मखु, ज्या क्यनेगु नामय् न्ह्यागुं अराजक, अवैधानिक ज्या यायेत नं तयार जुयाच्वंगु दु । ज्या क्यनेत अग्रसर जुइगु धइगु बांलाःगु हे खँ खः । जनताया चाहना कथं ज्या जुइ नं माः, थ्व खँय् विवाद मदु । तर जनतायात ज्या क्यनेगु नामय् गुगु कथं अराजकता ब्वयेगु ज्या यानाच्वंगु दु थुकिं धाःसा रास्वपाया सांसदतय्त हे न्ह्यसः थने गु ज्या जुयाच्वंगु दु । नकतिनि जक रास्वपाया सांसद राजुनाथ पाण्डें गोकर्णय् गुगु लँ तब्या याये गु नामय् सेनाया पःखाः तछ्यानाः, सैनिक अधिकृतलिसे वादविवाद यात, थ्व ज्या यायेगु स्वयां नं ‘स्टन्ट’ पाखे अप्वः केन्द्रित खने दु । छम्ह जनप्रतिनिधिं थःगु क्षेत्रया जनताया सः न्यनेमाः, अले अन दुगु समस्या समाधान यायेमाः । तर अन मेपिंसं याये त्यंगु ज्या तकं थःम्हं यानागु धकाः क्रेडिट कायेत गुगु कथं स्टन्ट जुल व धाःसा सुया निंतिं पचे जुइगु ज्या मखु ।
गोकर्णया लँ तब्या यायेगु निंतिं नेपाल ट्रस्टया जग्गाय् दयेकातःगु सेनाया कम्पाउण्ड वाल तछ्यायेगु निंतिं सांसद पाण्डे थः हे डोजर ज्वनाः वन । अले अन सेनाया छम्ह अधिकृत विधि व प्रक्रियाया खँ ल्हानाच्वंगु इलय् वयात हप्कीदप्की यानाः डोजर चले यायेगु ज्या यात । तर लिपा छु सीदत धाःसा सांसद पाण्डें धाथें लँ तब्या यायेगु निंतिं छुं याःगु मखु, नगरपालिकां लँ चायेकेगु निंतिं नेपाल ट्रस्टलिसे स्वीकृत कयाः बजेट तकं फ्याये धुंकल धइगु सीदये वं थम्हं लँ चाये कागु धइगु क्रेडिट कायेत काचाकाचां यानाः डोजर चले याःवंगु जुयाच्वन ।
सांसद पाण्डें याःगु ज्यायात कयाः प्रधानसेनापतिं तकं असन्तुष्टि प्वंके माःगु अवस्था वल । प्रधानमन्त्री सचिवालयं तकं न्ह्याथाय् नं प्रधानमन्त्रीया नां कयाः जुइमते धकाः सचेत याकेमाःगु अवस्था वल । पाण्डें याःगु थ्व ज्या मेपिंसं यायेत्यंगु ज्याय् ‘क्रेडिट’ कायेत स्वःगु ला जु हे जुल, थुकिया लिसें राजनीतिक, प्रशासनिक ज्ञानया अभावं नं थथे याः जूगु धइगु स्पष्ट दु । राजनीतिक व प्रशासनिक ज्ञान मदुपिसं याइगु ज्या गतिलाइ मखु धइगुया छगू दसु थ्व नं जूगु दु ।
गोकर्णेश्वर नगरपालिकां ज्या याइगु खँ सीकाः उकिया लबः कायेगु निंतिं हे सांसद पाण्डे हथासं डोजर ज्वनाः वंगु खः धइगु ला स्पष्ट हे जुइधुंकूगु दु । गुकिं यानाः सांसद पाण्डे या थ्व ज्या, धाथेंया ज्या मखुसे स्टन्ट जक खः धयागु नं स्पष्ट जुइधुंकूगु दु । थज्याःगु स्टन्टं देय्या विकास जुइ मखु, झन जक समस्या तच्वयेकेगु ज्या याइ धइगु सामान्य ज्ञान तकं रास्वपाया सांसदतय्के मदु धइगु खँ नं स्पष्ट जुजुं वयाच्वंगु दु । सांसदया ज्या धइगु विधि व प्रक्रियायात कार्यान्वयन याकेत भूमिका म्हिते गु खः । सांसद धइपिं थः हे नीति व कानुन दयेकीपिं खः । तर जब सांसदत थः हे अराजक जुयाः थुकथं गैरकानुनी, अराजक ज्या याः जुइ, उकिं द्वन्द्व हे जक ब्वलंकी । आः गोकर्णया थ्व लँपु चायेकेगु ज्याय् नं द्वन्द्व ब्वलनीगु अवस्था दु ।
छगू ला नगरपालिका व सांसद दथुइ सुनां ज्या याःगुया जस कायेगु धइगु द्वन्द्व दु, मेगु सेना तंम्वयाः ज्या याकेमबी ला धयागु ग्याःचिकु नं दु । थज्याःगु अवस्थां घाटाया सर्वसाधारण जनतायात हे लाइ । यायेमाःगु समाधान खः, तर पाण्डे या ज्याया जस कायेगु व स्टन्ट यायेगु लोभं द्वन्द्व हे जक ब्वलंकाबिउगु दु । थज्याःगु खँय् रास्वपाया सांसद वा नेतातय्सं जक मखु मन्त्री जूपिंसं तकं बिचाः यायेमाःगु अवस्था दु । छाय्धाःसा रास्वपाया मन्त्री जुइपिंलिसें प्रधानमन्त्रीया सचिवालयय् च्वनाच्वंपिंसं नं विधि व प्रक्रियात पालना यानाच्वंगु मदु धइगु खँ आपालं घटनाक्रमं क्यनाच्वंगु दु ।
दसुया निंतिं पासपोर्ट छपाइ काण्डय् प्रधानमन्त्री सचिवालयया दुजःपिसं अनधिकृत रुपं परराष्ट्र मन्त्रालयय् हस्तक्षेप यानाः पासपोर्ट छापे यानाच्वंगु जर्मनी कम्पनी लिसेया ठेक्का त्वाःथलेत बिउगु खँ सार्वजनिक जुइधुंकूगु दु । अख्तियार दुरुपयोग अनुसन्धान आयोगया पदाधिकारीतय्त प्रधानमन्त्री कार्यालयय् बन्धक दयेकाः पासपोर्ट छापे यायेगु ठेक्का बिउपिं सरकारी कर्मचारीतय्त ज्वनेत दबाब बीगु, थःगु हे मन्त्रिमण्डलया छम्ह मन्त्रीयात चान्हय् हे राजीनामा बीत धम्की बीगु आदि ज्या स्वयम प्रधानमन्त्री कार्यालयया सचिवालयपाखें जूगु दु । थज्याःगु ज्यां जनताय् गज्याःगु सन्देश वनी व राज्य सञ्चालनय् गुकथंया लिच्वः लाइ धइगु सामान्य ज्ञान तकं प्रधानमन्त्री कार्यालयया सचिवालयं बिचाः याःगु खनेमदु । परराष्ट्र मन्त्री शिशिर खनालं पासपोर्ट छापे यायेगु खँय् यदि अडान मकाःगु खःसा थुकिं नेपाःया अन्तर्राष्ट्रिय छवियात हे धुमिल याइगु खः । पासपोर्ट छापे यायेत बियातःगु ठेक्का धाथें त्वाःथःगु जूसा सम्बन्धित कम्पनी मध्यस्थताया निंतिं अन्तर्राष्ट्रिय अदालत वन धाःसा उकिं लाइगु आर्थिक नोक्सानयात तकं प्रधानमन्त्री कार्यालयं बिचाः याःगु खनेमदु ।
उकथं हे चान्हय् मन्त्रीयात राजीनामा बीत बिउगु दबाब धइगु नं विधि व प्रक्रिया अःखः खः । छाय्धाःसा सम्बन्धित मन्त्रीया राजीनामा फ्वनेगु अधिकार प्रधानमन्त्रीया खः । तर प्रधानमन्त्रीया सचिवालयया दुजःपिंसं मन्त्रीया राजीनमा फ्वनेगु गुगु ज्या जुल थुकिं राजनीतिक अराजकता ब्वलंकेगु बाहेक मेता ज्या याइ मखु । पेट्रोलियम पदार्थया भाः क्वःकाःगु खँय् प्रधानमन्त्री सचिवालयं उद्योग वाणिज्य तथा आपूर्ति मन्त्रीया राजीनामा फ्वनेगु ज्या याःगु खँ सार्वजनिक जुइधुंकूगु दु । पेट्रोलियम पदार्थया भाः थकायेगु वा क्वकायेगु ज्या मन्त्रीं याइ मखु धइगु सामान्य ज्ञान तकं प्रधानमन्त्रीया सचिवालयया दुजःपिंके मदुगु ला पक्का नं खइ मखु तर प्रधानमन्त्री सचिवालयं थःगु अधिकार क्षेत्रं पिहां वनाः मन्त्रीयात राजीनामा बीत गुगु दबाब बिल थ्व अराजकताया पराकाष्ठा खः । थ्व अवस्थाय् मन्त्रीं गुगु सुझबुझ कथं लिसः बिल, थ्व धाःसा च्वछायेबहःगु खँ जुल ।
थज्याःगु हे अराजकता गृहमन्त्री सुधन गुरुङं नं क्यनाच्वंगु दु । गणेश नेपालीया आत्मदाह निसें सुनसरीया घटनाय् तक गृहमन्त्रीया सचिवालयया दुजःपिं गुकथं सक्रिय जुल, थुकिं नं थीथी कथंया न्ह्यसः ब्वलंकेगु ज्या जूगु दु । कानुनं म्हसिउगु धइगु गृहमन्त्री गुरुङयात खः । गृहमन्त्रीया सचिवालयया दुजःपिंत कानुनं म्हमसिउ । तर गृहमन्त्रीया सचिवालयया दुजःपिंसं सुनसरी घटनाय् सुरक्षा निकाययात गुकथं निर्देशन बिल, थ्व छुं नं कथं पाय्छि मखु । कानुनं म्हमसिउपिंसं बिउगु निर्देशन छुं गथे जुयाः गलत जुल धाःसा उकिया जिम्मेवारी सुनां कायेगु ? गृहमन्त्रीं थ्व जिं बियागु निर्देशन मखु धकाः लिचिलेगु कि सचिवालययात दोष बियाः थःगु दायित्वं बिसिउँ वनेगु ? अथे जुयाः आःया मन्त्रिमण्डलय् दुपिं मन्त्रीतय्सं थ्व खँय् बिचाः यायेमाः । थःगु अधिकार गुकथं, गबलय् छ्यलेगु धइगु ज्ञान काये हे माः । सचिवालयया दुजःपिंसं यानाच्वंगु ज्या कानुन सम्मत खः कि मखु धइगु बारे बिचाः याये हे माः ।
समग्र रुपय् स्वयेगु खःसा रास्वपाया प्रधानमन्त्री निसें मन्त्री व यक्व सांसदत थःगु भूमिका व दायित्व बारे स्पष्ट जुयाच्वंगु खनेमदु । थुकिया मू कारण धइगु राजनीतिक व प्रशासनिक ज्ञानया अभाव हे खः । अथे जुयाः आः रास्वपां प्रधानमन्त्री निसें मन्त्री व सांसदतय्त रजनीतिक व प्रशासनिक प्रशिक्षण बीमाःगु आवश्यक दु । मखुसा रास्वपाया मन्त्री निसें सांसदतय्सं थथे हे स्टन्ट यायेगु बाहेक मेता ज्या याइगु खने मदु । आः हे मन्त्री व सांसदतय्त चीगु कुतः मयात धाःसा थुकिं तःधंगु दुर्घटना लाइगु सम्भावना दया हे च्वनी ।
LEAVE YOUR COMMENTS