यलया प्राचीन ततु पुखूया जिर्णोद्वार

यल(नेपालभाषा टाइम्स)- यल महानगरपालिका वडा नं. ५ य् च्वंगु ऐतिहासिक व प्राचीन ततु पुखू जिर्णोद्वारया ज्या न्ह्याकूगु दु । पितृ तर्पण व श्राद्धलिपा प्यं वायेगु थाय्या रुपय् दयाच्वंगु उगु प्राचीन पुखूया जिर्णोद्वार ज्या न्ह्याकूगु खः ।

छगू इलय् १९ रोपनी क्षेत्रफलय् न्यनाच्वंगु झिंखुगूगु शताब्दीपाखे निर्माण जूगु विश्वास यानातःगु पुखू आः वयाः छपी जग्गाय् सीमित जूगु पुखू जिर्णोद्वार तथा उपभोक्ता समितिं जानकारी बिउगु दु । बजेट अभावया कारणं पुखू संरक्षण यायेगु ज्या लिज्यानाच्वंगु खः । आः वयाः यल महानगरपालिकाया २४ गू लाख लागतय् पुखू जिर्णोद्वारया ज्या न्ह्याकूगु खः । यल महानगरं पुखू जिर्णोद्वारया निंतिं उपलब्ध याकूगु बजेट नं अपर्याप्त जूगु समितिया अध्यक्ष केशव खड्कां कनादीगु दु ।

छुं दँ न्ह्यः तक त्यांका भैरव (टिका भैरव)जुयाः बाः वइगु राजकुलोया लखं जाइगु ततु पुखू आः वयाः राजकुलो नं सुना वंगुलिं वाति लखय् निर्भर जुइमाःगु अवस्था दु । प्यं थयाः वायेधुंकाः आवश्यक जुइगु लःया निंतिं स्थानीय उपभोक्ता समितिं वैकल्पिक व्यवस्था यानाः पुखुलिइ लः जायेकेगु याना वयाच्वंगु दु ।