ने. सं. ११४६ दिल्लागा द्वादशी -

इरान-ओमान वार्ता प्रगतिपाखे, होर्मुज चायेकेत इरानया खुगू सर्त

बीबीसी – होर्मुज जलमार्गय् जहाज सुरक्षित वयेवनेया निंतिं लँपु व्यवस्थापन बारे इरान व ओमान दथुइ जुयाच्वंगु वार्ता प्रगाति जुयाच्वंगु दु । ओमानया विदेश मन्त्रालयं निगुलिं पक्षया दथुइ सकरात्मक वार्ता जुयाच्वंगु धाःगु दु । तर वार्ताय् छुं अज्याःगु सहमति जुइत्यंगु जूसां व्यापारिक रणनीतिया ल्याखं महत्वपूर्ण होर्मुज जलमार्ग तत्कालया निंतिं मचालीगु इरानं स्पष्ट याःगु दु ।

शनिवाः निगुलिं देशं वार्ताय् प्रगति जुयाच्वंगु धाःसां उकिया समयसीमा धाःसा अझ अस्पष्ट दु । ओमानया विदेश मन्त्रालयं लः जहाजयात लक्षित यानाः आक्रमण जुल धाःसा उकिया प्रतिक्रिया स्वरुप अवरोध जुइगु धाःगु दु ।

इरान होर्मुज जलमार्ग चायेकेगु नितिं अमेरिकाया न्ह्यःने थीथी सर्त न्ह्यःने हःगु दु । इरानया विदेशमन्त्री अब्बास अराघचीं ओमानलिसेया वार्ता लिपांगु चरणय् थ्यंगु तर होर्मुजया लँपु चायेकेगु निंतिं थःपिनिगु ‘मेमेगु सर्तत’ ल्यं दनिगु धाःगु दु । विदेशमन्त्री अराघचीं उगु व्यस्त जलमार्ग हाकनं व पूर्ण रुपं खुल्ला यायेत मेमेगु आपालं सर्तत पूवंकेमाःगु संकेत नं याःगु दु ।

विश्वया निंतिं चिकं व प्राकृतिक ग्यासया २० प्रतिशत ढुवानी जुइगु होर्मुज जलमार्गयात अमेरिका व इजरायल जानाः वंगु फेब्रुअरीइ याःगु आक्रमण लगत्तै इरानं जलमार्ग ठप्पा याना बिउगु खः । लिपांगु इलय् इरान व ओमान दथुइ जुयाच्वंगु वार्ताय् उगु जलमार्गय् जहाज वयेवनेया निंतिं न्हूगु लँपु क्वःछीगु खँय् सम्भावित सहमति मालेगुपाखे नं लक्षित जुयाच्वंगु दु । अज्याःगु लँपुया निंतिं निगुलिं देय् जिम्मेवार जुइमाःगु व लः जहाजत वयेवनेया निंतिं सहज यायेगुपाखे प्रगति जुइगु आशा नं याःगु दु ।

इरानं होर्मुज पूवंक चायेकेया निंतिं अमेरिकाया न्ह्यःने खुगू सर्त तःगु दु । इरानया सुरक्षा प्रमुख मोहम्मद बकेर जोल्कादरं इरानी समाचार संस्था तस्नीमलिसे जूगु खँल्हाबल्हाय् अमेरिकां थःगु व्यवस्था भिंकेगु ज्या मयाःतले होर्मुज चालीमखु धाःगु दु । सुरक्षा प्रमुख जोल्कादरयाकथं होर्मुज जलमार्ग चायेकेत अमेरिकां खुगू सर्त पूवंकेमाःगु स्पष्ट याःगु दु ।

सर्तकथं अमेरिकां इरानयात सैन्य ख्याच्वः बीगु बन्द यायेमाःगु, इरानी बन्दरगाहय् अमेरिकां तयातःगु नाकाबन्दी चिकेमाःगु, रोक्का यानातःगु इरानी सम्पत्ति फुकुवा यायेमाःगु, इरान विरुद्धया आर्थिक प्रतिबन्ध छ्वासुकेमाःगु, युद्धय् जूगु क्षतिया क्षतिपूर्ति अमेरिकां बीमाःगु व अमेरिका – इरान दथुइ जूगु युद्धविरामया सम्झौता उल्लघंनया विषय समाधान जुइमाःगु न्ह्यथंगु दु ।

अमेरिकी राष्ट्रपति डोनाल्ड ट्रम्पं इरानलिसे याकनं हे सहमति जुइगु धया वयाच्वंगु दुसा उपराष्ट्रपति जेडी भान्सं वार्ताय् प्रगति जुयाच्वंसां आपालं ज्या ल्यं दनिगु धाःगु दु ।

भान्सं उत्कृष्ट लिच्वः हासिल यायेत कूटनीतिक, आर्थिक व सैन्यलिसें सकतां विकल्पत उपयोग जुयाच्वंगु धाःगु दु । लिसें भान्सं फेब्रुअरी २८य् शुरु जूगु युद्ध स्वयां न्ह्यःया हे परिमाणय् चिकं ढुवानी जुइगु दाबी नं याःगु दु ।