येँ महानगरया प्रमुख प्रशासक सेवा निवृत्त
येँ (नेपालभाषा टाइम्स) – येँ महानगरपालिकाया प्रमुख प्रशासकीय अधिकृत सरोज गुरागाइँ सेवा निवृत्त जुयादीगु दु । वंगु बुधवाःनिसें गुरागाइँ सेवा निवृत्त जुयादीगु खः । बुधवाः हे महानगरपालिकां छगू ज्याझ्वःया दथुइ वय्कःयात विदाइ याःगु खः ।
नेपाल सरकार मन्त्रिपरिषद्या निर्णयकथं २०८१ भदौ २७ गते येँ महानगरया प्रमुख प्रशासकीय अधिकृत जुयादीम्ह वय्कलं असोज ७ गते पदबहाली यानादीगु खः । उमेर हदया कारणं वय्कलं बुधवाःनिसें अनिवार्य अवकाश कयादीगु खः ।
येँ महानगरपालिकाया कार्यवाहक प्रमुख सुनिता डंगोल, प्रवक्ता नविन मानन्धर, कार्यपालिकाया दुजःपिं, विभागीय प्रमुख, महाशाखा प्रमुखपिंसं वय्कःयात विदाइ बियादीगु खः ।
उगु इलय् कार्यवाहक प्रमुख डंगोलं कर्मचारी, जनप्रतिनिधि व साझेदार निकायलिसेया सहकार्य, समन्वय व सहअस्तित्वया निंतिं गुरागाइं यानादीगु प्रशासनिक नेतृत्व येँ महानगरपालिकां न्ह्याबलें लुमंका च्वनी धयादिल । ‘पद अस्थायी खः, सेवा स्थायी खः’, कार्यवाहक प्रमुख डंगोलं धयादिल, ‘पदीय दायित्व सिधंसां सेवा गबलें नं सिधइमखु, सेवा निवृत्त जीवनय् छिगु सेवा यात्रा अझ परिष्कृत जुइगु आशा यानागु दु ।’
सेवा निवृत्त जुयादीम्ह गुरागाइं थःगु ३२ दँ स्वयां ताःहाकःगु सेवा अवधिइ येँ महानगरपालिकाय् च्वना यानागु सेवा अवधि दकलय् ल्वःमंके मफइगु ई जूगु खँ कनादिल । प्रशासनिक सेवा वइगु थथ्याःक्वथ्याः कर्मचारीया निंतिं स्वाभाविक खः धासें थुकियात थम्हं सहज रुपं कयागु वय्कलं धयादिल ।
२०५१ पुस १९ गते शाखा अधिकृतपाखें निजामती सेवा दुहां वःम्ह गुरागाइँ येँ महानगरपालिकाया इतिहासय् हे प्रमुख प्रशासकीय अधिकृत पदपाखें सेवा निवृत्त जुयादीम्ह न्हापांम्ह अधिकारी खः ।
LEAVE YOUR COMMENTS