ने. सं. ११४६ बछलागा द्वादशी -

रोनाल्डोया ७०० गोल पूवन

क्रिष्टियानो रोनाल्डो थःगु व्यक्तिगत ७०० गोलया अतिविशिष्ट सफलता चूलाकेत ताःलाःगु दु । सोमवाः युक्रेन विरुद्ध जूगु युरो २०२०या छनोट कासाय् गोल यासें रोनाल्डो थ्व ल्यान्डमार्क चूलाकेत ताःलाःगु खः । रोनाल्डों व्यक्तिगत सफलता चूलाकूगु थ्व कासा धाःसा पोर्चुगल २–१ गोलं पराजित जुल ।

थुकी रोनाल्डों पेनाल्टिपाखें गोल यासें ७०० गोलया सफलता चूलाकूगु खः । थःगु व्यक्तिगत ७०० गोल थ्यंकेगु झ्वलय् रोनाल्डों ९७३ गू म्याच म्हितेमाल, गुकी ४५८ गू कासाय् म्होतिं नं छगू गोल याःगु खः ।

थ्व गोल लिसें रोनाल्डों ७०० गोल पूवंकूपिं इलाइट गु्रपय् दुहां वंगु दु । तर अप्वः गोल याःगु कीर्तिमान तयेत धाःसा रोनाल्डों अझं सछिगुलिं मल्याक गोल याये ल्यंदनि । आःतक दकलय् अप्वः गोल याःगु रेकर्ड चेक–अष्ट्रियन कासामि जोसेफ बिकानया नामय् दु । विकानं थःगु क्यारियरय् ८०५ गोल याःगु खः ।