राप्रपा सरकार गठनया चलखेलय् मवनीगु

येँ (नेपालभाषा टाइम्स) – राष्ट्रिय प्रजातन्त्र पार्टीं प्रदेश सरकार दयेकेगु गणितीय चलखेलय् थःपिं मवनेगु निर्णय याःगु दु । म्हिगः च्वंगु कार्यसम्पादन समितिया बैंठकं सत्ताया चलखेलय् राप्रपां ब्वति मकायेगु निर्णय याःगु खँ प्रवक्ता मोहन श्रेष्ठं कनादीगु दु । प्रदेश सरकार नीस्वनेगु ज्या कांग्रेस, एमाले व नेकपा जानाः यायेमाः धइगु थःपिनिगु धापू जूगु खँ नं प्रवक्ता श्रेष्ठं धयादीगु दु । वय्कलं प्रदेश सरकारया सम्बन्धय् गुगुं नं निर्णय यायेमाःगु अवस्था वल धाःसा पार्टीया वृहत्तर हितयात ध्यानय् तयाः उपयुक्त इलय् निर्णय कायेगु जिम्मा अध्यक्षयात बिउगु खँ नं धयादीगु दु ।