संकटा व सरस्वति त्यात

येँ – शहीद स्मारक ए डिभिजन लिग अन्तर्गत बिहिवाः जूगु कासाय् सरस्वती युवा क्लब व संकटा क्लब त्याःगु दु । थौंया विजय लिपा संकटां शीर्ष थासय् लानाच्वंगु मनाङ्ग मस्र्याङ्गदी लिसें अंक बराबरी यायेत ताःलाःगु दु । मनाङ्ग धाःसा संकटां स्वयां छगू कासा म्हो जक म्हितूगु दु ।

संकटां बिहिवाः जूगु कासाय् हिमालयन शेर्पायात २–० गोलं बुकूगु खः । थ्व विजय लिपा संकटाया च्यागू कासा लिपा २१ अंक थ्यंगु दुसा आःतक पराजय मफःनिगु मनाङ्गया नं ७ गू कासा म्हिताः २१ अंकय् दु । संकटाया निंतिं सेडरिक अबा व दिपेश आलेमगरं छगू छगू गोल याःगु खः ।

कासा सुरु जूगु ११ औं मिनेटय् सेडरिकं न्हापांगु गोल याःगु खःसा थ्वयां स्वंगू मिनेट लिपा हे दिपेशं हिमालयन शेर्पा डिफेन्डरतय् कमजोरीया लबः कयाः मेगु गोल याःगु खः । निगू गोलं लिउने लायेधुंकाः नं हिमालयन शेर्पां संकटायात दबाबय् लाकूगु खःसां गोल धाःसा यायेमफुत ।
संकटा लिसेया पराजय लिपा हिमालयन शेर्पा ११ अंकय् हे सीमित जूगु दुसा ल्याः धखलय् खुगूगु थासय् लानाच्वंगु दु ।

मेखे सरस्वतीं धाःसा एनआरटीयात १–० गोलं बुकल । न्हापांगु हाफ गोलरहित बराबरीइ क्वचाःगु खःसा निगूगु हाफया ७३ औं मिनेटय् सरस्वतीया भिक्टर एमओबीं पेनाल्टिपाखें विजयी गोल याःगु खः । एनआरटीया कासामिं बक्स दुने ह्याण्ड यायेवं सरस्वतीयात पेनाल्टि वःगु खः ।

थ्व विजय लिपा सरस्वती ९ अंक कयाः ल्यां धखलय् नं गुंगूगु हे थासय् दुसा एनआरटी धाःसा लगातार न्हयगूगु पराजय फयाः ल्याः धलखय् अन्तिम थासय् दु ।