सम्पत्ति करया निंतिं मालपोतलिसे समन्वय बैठक च्वनीगु
येँ (नेपालभाषा टाइम्स) – येँ महानगर पालिकां मू सतकं दुने लाःगु भवन संरचनाया कर मालपोत ज्याकूलिसे समन्वय यानाः क्वःछीगु जूगु दु । कार्यवाहक प्रमुख सुनिता डंगोलं मू सतकयात आधार कयाः दुनेया भवन संरचनाया सम्पत्ति कर क्वःछीगु इलय् करदातायात लाःगु मारया विषयय् मालपोत ज्याकूलिसे समन्वय बैठक यानाः क्वःछीगु धयादीगु खः ।
कार्यवाहक प्रमुख डंगोलं महानगरपालिकाया केन्द्रीय ज्याकू काठमाडौं प्लाजाय् च्वंगु कार्यपालिकाया ५५ क्वःगु बैठकय् उगु खँ धयादीगु खः ।
विधायन समितिया संयोजक लिसें २३ वडाअध्यक्ष मचाराजा महर्जनं विविध विषय अन्तर्गत ल्ह्वनादीगु न्ह्यसःया लिसः बियादिसें कार्यवाहक प्रमुख डंगोलं मालपोत ज्याकूलिसे समन्वय बैठक यानाः समाधान मालेगु धयादीगु खः । लिसें वय्कलं मालपोत ज्याकूलिसेया समन्वय बैठकं निष्कर्ष पिहां मवःसा कार्यपालिका अन्तर्गयत विधायन समिति, राजस्व समिति व सहरी योजना आयोगं मंकाःकथं अध्ययन यानाः समाधान पिकायेगु नं धयादीगु दु ।
‘राजस्वया दरय् हेरफेर यायेबलय् दूरगामी लिच्वः लाये फइगु जूगुलिं अज्याःगु शीर्षकय् अध्ययन मयासे हेरफर यानागु मदु । विगतया दररेटय् छु दुगु खः, व हे कायम यानागु दु’, कार्यवाहक प्रमुख डंगोलं धयादिल ।
बैठकय् प्रशासनपाखें सुशासन समितिया संयोजक ख्यामराज तिवारी, सम्पदा व पर्यटनपाखें सम्पदा व पर्यटन समितिया संयोजक आशामान संगत, सामाजिक ख्यःयापाखें समितिया सदस्य सचिव समीक्षा निरौला, स्वास्थ्ययापाखें विभागया प्रमुख दीपककुमार केसी व वातावरण ख्यःयापाखें समितिया सदस्य सचिव सरिता राईं प्रस्ताव न्ह्यब्वयादीगु खः ।
उगु हे बैठकं बाइक एम्बुलेन्स संचालन यायेगु निर्णयलिसें काठमाडौं फिल्म फेस्टिभलया निंतिं कार्ययोजना व अनुमानित बजेट नं स्वीकृत याःगु दु ।
थुकथं हे भूमि समस्या समाधान समितिपाखें प्राप्त पौया विषयय् नं ताःहाकः हे सहलह जूगु खः ।
LEAVE YOUR COMMENTS