अमेरिकाविरुद्ध नेपाः त्यात

येँ – आइसिसी विश्वकप लिग २ अन्तर्गत जुयाच्वंगु त्रिकोणात्मक एकदिवसीय शृङ्खलाय् नेपालं म्हिगः अमेरिकायात बुकूगु दु । शृङ्खलाया न्हापांगु विजय चूलाकेगु झ्वलय् म्हिगः नेपालं अमेरिकायात ३५ रनं बुकूगु खः । नेपालं न्हापां ब्याटिङ यासें १९० रन दयेकूगु खःसा लिपा ब्याटिङ याःवःगु अमेरिका ४४.१ ओभरय् मुक्कं १५५ रन दयेकाः अलआउट जूगु खः ।

अमेरिकायात बुकेगु निंतिं म्हिगः नेपाली बलरतय्सं शानदार प्रदर्शन यायेगु झ्वलय् ४ ओभरय् प्यम्हेसित आउट याःगु खः । स्पिनर सन्दीप लामिछानें निगूगु ओभरया प्यंगूगु बलय् हे ओपनर आरोन जोन्सयात ५ रनय् हे एलबिडल्यू यानाः आउट यानाबीगु खः । थ्व धुंकाः स्वंगूगु ओभरया प्यंगूगु बलय् करण केसीं अमेरिकाया मू ब्याट्सम्यान स्टिभन टेलरयात शून्यय् क्याच आउट यानाबिउगु खः । थ्वयां छगू बल लिपा हे करणं जेभियर मार्सयात विकेटकिपर विनोद भण्डारीया ल्हातिं क्याच आउट याकाबिउगु खः । सन्दीपं प्यंगूगु ओभरया प्यंगूगु बलय् मोनाक पटेलयात ४ रनय् एलबीडब्ल्यू आउट यानाबिउगु खः । प्यंगू विकेट वंबलय् तक अमेरिकां मुक्कं १३ रन जक दयेकेत ताःलाःगु खः ।
अमेरिकाया निंतिं म्हिगः इरान होल्यान्डं दकलय् अप्वः ७५ रनया योगदान बिल । होल्यान्डं १११ बलय् ७ चौका थ्वासें ७५ रन दयेकूगु खः । वयात करण केसीं ४१ औं ओभरय् क्याच आउट याकाबिउगु खः ।

नेपाःया निंतिं करण केसीं प्यंगू, सुशन भारीं स्वंगू, सन्दीपं निगू व कुशल मल्लं छगू विकेट काःगु खः । कुशल थःगु डेब्यु कासाय् हे अर्ध सतक दयेकेगुलिसें विकेट कायेत नं ताःलाःगु खः । न्हापां ब्याटिङ्ग याःवःगु नेपाःया निंतिं कुशल व विनोद भण्डारीं अर्धसतकीय पारी म्हितूगु खः ।

विनोदं ७९ बल म्हिताः खुगू चौका व छगू छक्काया ग्वाहालिं ५९ रन दयेकूगु खः । विनोदया नं थ्व एकदिवसीय कासाय् न्हापांगु अर्धसतक खः । मेखे थुगु कासाय् डेब्यु याःम्ह मल्लं ५१ बलय् ४ चौका व ३ छक्काया ग्वाहालिं ५० रन दयेकूगु खः । थुकिया लिसें कुशल एकदिवसीय कासाय् अर्धसतक पूवंकूम्ह दकलय् कान्छाम्ह कासामि नं जूगु दु ।

न्हापांगु कासाय् ओमानलिसे बूगु नेपालं थौं ओमान लिसे हे मेगु कासा म्हितेत्यंगु दु ।

सम्बन्धित बुखँ

LEAVE YOUR COMMENTS