जापानयात कोलम्बियालिसे बदला कायेगु ह्वःताः

थुगुसीया विश्वकपया अन्तिम समूह एच अन्तर्गत थौं जापानं कोलम्बिया लिसे व पोल्यान्डं सेनेगल लिसे धेंधेंबल्लाः यायेत्यंगु दु । थौं हे समूह ‘ए’या निगूगु कासा सुरु जुइ । समूह ए पाखे इजिप्टं ग्वसाः दे रुसया सामना यायेत्यंगु दु । सन् २०१४ य् जूगु विश्वकपया नकाउट चरणय् नं कोलम्बिया व जापान दथुइ कासा जूगु खः । उबलय् कोलम्बिया जापानयात बुकाः क्वाटरफाइनलय् दुहां वंगु खः ।

ब्राजिलय् जूगु उगु विश्वकपय् कोलम्बियाया स्ट्राइकर जेम्स रोड्रिग्वेजं गोल्डेन बुट नं त्याकूगु खः । व हे स्टार कासामि रोड्रिग्वेज थौंया कासाय् नं दइ । थुकिया लिसें प्रशिक्षक जोस पेकरम्यानया टिमय् राडामेल फाल्काओ थेंज्याःम्ह स्ट्राइकर नं दुथ्यायेधुंकूगु दु । वंगु संस्करणय् चोटया कारणं म्हितेमखंम्ह फाल्काओं थ्व विश्वकपय् डेब्यु यायेत्यंगु खः ।

विश्वकपया वंगु संस्करणय् जापानयात ४–१ गोलं बुकाः क्वार्टरफाइनल तक दुहां वंगु कोलम्बियां थुगुसी नं थ्व ऐतिहासिक सफलतायात दोहरे यायेगु निंतिं म्हितीगु जुइ । मेखे सन् १९९८ य् न्हापांखुसी विश्वकप म्हितूगु जापान अनं निसें लगातार खुक्वःतक विश्वकपया अन्तिम चरणय् थ्यनाच्वंगु दु । जापानयात थ्व पालय् न्हापांगु चरणय् कोलम्बियायात वंगु संस्कारया पराजयया बदला कायेगु ह्वःताः चूलाःगु दु ।

सन् २००२ व २०१० निक्वः तक नकआउट चरणय् दुहां वनेत ताःलाःगु जापानं थ्व पालय् नं न्हापांगु चरण पार यायेगु कुतः याइगु जुइ । मेखे समूह एच अन्तर्गतय् हे पोल्यान्ड व सेनेगल दथुइ धाःसा न्हापांखुसी कासा जुइत्यंगु दु । थुपिं निगू टिम थ्वयां न्ह्यव गुबलें नं म्हितूगु मदुनि । सेनेगल सन् २००२ लिपा न्हापांखुसी विश्वकप म्हिताच्वंगु दुसा पोल्यान्ड सन् २००६ लिपा न्हापांखुसी विश्वकप यात्राय् वःगु खः ।

सन् २००२ लय् विश्वकपय् डेब्यु याःगु इलय् हे उबलय्या डिफेन्डिङ च्याम्पियन फ्रान्सयात बुकाः सनसनी न्यंकूगु सेनेगलं थ्व पालय् नं थज्याःगु सनसनी क्यनेफइ ला स्वये ल्यं दनि । मेखे पोल्यान्ड धाःसा सन् १९७८ व १९७२ इ निक्वः तक स्वंगूगु थासय् लायेधुंकूगु टिम खः ।