ने. सं. ११४६ दिल्लागा चौथी -

अमेरिकां इरानय् जुयाच्वंगु आक्रमण दिकल

एजेन्सी – अमेरिकी राष्ट्रपति डोनाल्ड ट्रम्पं यदि याकनं सम्झौता यात धाःसा इरानय् जुयाच्वंगु आक्रमणयात रद्द यायेगु धाःगु दु । सामाजिक सञ्जाल ट्रुथ सोसियलय् छगू पोस्ट यासे ट्रम्पं इरानलिसे तत्काल सम्झौता यायेफत धाःसा आक्रमण मयायेगु धाःगु खः । ट्रम्पं सम्झौताकथं होर्मुज जलमार्ग तत्काल चायेकेमाःगु व इरानया परामाणु खतराया अन्त्य यायेमाःगु धाःगु दु । थ्व निर्णयय् इजरायलया नं सहमति दुगु ट्रम्पं धाःगु दु ।

अमेरिकी सञ्चार माध्यमतय्सं इजरायल व अमेरिकां तेहरानय् थ्व हे वाःया दुने तःधंगु सैन्य आक्रमण यायेगु तयारी यानाच्वंगु धकाः बिउगु समाचारया छुं ई लिपा हे ट्रम्पया थ्व धापू वःगु खः । तेहरानं धाःसा अमेरिकां तनाव तच्वयेकेत स्वयाच्वंगु द्वपं बिउगु दु । वासिङ्टनयात ग्वाहालिइ याइगु देय्त नं थ्वहे युद्धया मिइ च्यानाः नष्ट जुइगु ख्याच्वः नं इरानं बिउगु दु ।

अमेरिकी राष्ट्रपति ट्रम्पं याःगु पोस्टय् अमेरिकां निक्वःगु विश्वयुद्ध लिपा याःगु आःतकया दकलय् तःधंगु स्तरया सैन्य कारवाही यायेत तयार अवस्थाय् थःपिं दुगु तर इरान व पश्चिम एसियाया राष्ट्रतय्सं वार्ताया निंतिं इनाप याःगुलिं जक आक्रमण दिकागु खँ धाःगु दु । ट्रम्पया घोषणायात कयाः इरानं धाःसा प्रतिक्रिया बिउगु मदुनि ।

थ्वहे दथुइ अमेरिकी विदेश मन्त्रालयं मध्यपूर्व च्वनाच्वंपिं थः नागरिकतय्त सर्तक जुयाच्वनेत व तनाव तच्वल धाःसा उगु थाय् त्वःता वनेत तयार जुुयाच्वनेत धाःगु दु । शनिवाः पित बिउगु छगू विज्ञप्तिइ उडान रद्द जुइफइगु, हवाइ मार्ग बन्द जुइफइगु व यात्राय् अवरोध जुइफइगुलिं तयार जुयाच्वनेत धयातःगु खः ।

अमेरिका व इरानया दथुइ वंगु अप्रिलय् हे युद्धविराम यायेगु सहमति जूगु खः, तर जुनय् हे युद्धविराम विफल जुल । निगुलिं पक्षं मदिक्क आक्रमण-प्रत्याक्रमण यानाच्वंगु दु । छुं न्हि न्ह्यःतिनि अमेरिकां थःपिनि सैन्य अड्डाय् हमला जूगु धासें इरानय् हवाइ आक्रमण याःगु खः ।

अमेरिकां इरानी बन्दरगाहय् नाकाबन्दी तयातःगु दुसा, इरानया थीथी सैन्य व रणनीतिक स्थलय् आक्रमण यायेगु व इजरायललिसे जाना मंकाः सैन्य अभियान नं न्ह्याकाच्वंगु दु । बीबीसीया कथं अमेरिका व इजरायलं इरानया ऊर्जा संरचनाय् आतकया तःधंगु बमबारी यायेगु योजना दयेकातःगु दु ।

मेखे इरानं मध्यपूर्वय् च्वंगु अमेरिकी सैन्य अड्डायात लक्षित यासें हमला यानाच्वंगु दुसा होर्मुज क्षेत्रय् जहाज आवागमनयात प्रभावित यानाच्वंगु दु ।