पभार्डया गोल उत्कृष्ट

वंगु विश्वकपय् जूगु गोल मध्ये फ्रान्सया बेन्जामिन पभार्डं याःगु गोल उत्कृष्ट गोल जूगु दु । फिफाया वेबसाइटय् जूगु अनलाइन मतदातय् पभार्डं अर्जेन्टिना विरुद्ध याःगु गोल उत्कृष्ट जूगु खः । रसियाया विश्वकपय् जूगु ६४ गू कासाय् १६९ गू गोल जूगु खः । थुकी मध्ये फिफां बांलाःगु १० गोल ल्ययाः उत्कृष्ट गोल ल्ययेत मतदान याकूगु खः ।

गुकी २२ दँया डिफेन्डर पभार्डं याःगु गोल उत्कृष्ट जूगु खः । अथेहे निगूगु स्थानय् कोलम्बियाया जुआँ क्विन्टेरों याःगु गोल लाःगु दुसा स्वंगूगु थासय् क्रोएसियाया लुका मोड्रिकं याःगु गोल लाःगु दु । अथेहे प्यंगूगु व न्यागूगु थासय् छसिकथं रोनाल्डों स्पेन विरुद्ध याःगु फ्रिकिक गोल व मेसीं नाइजेरिया विरुद्ध याःगु गोल लाःगु खः ।

थ्व धुंकाः छसिकथं डेनिस चेरिसेभ, वासिर चादिल, अहमद मुसा, रिकार्डो व टोनी क्रुसया गोल लाःगु खः । बेन्जामिन पभार्ड सन् २००६ लिपा विश्वकपय् उत्कृष्ट गोलयाम्ह न्हापांम्ह युरोपियन कासामि खः ।