अनन्तं आतक लिग म्हिते मखंनि

येँ – थन न्ह्यानाच्वंगु शहीद स्मारक ‘ए’ डिभिजन लिगय् आतक गुंगूगु चरणया कासा क्वचायेधुंकूगु दु । तर थ्व गुंगू चरणया कासा क्वचाःगु अवधि तकया दुने छम्ह कासामिं छगू नं कासा म्हितेखंगु धाःसा मदुनि । उम्ह कासामि खः नेपाःया राष्ट्रिय टोलीया रक्षक अनन्त तामांग ।
निगू तःधंगु फुटबल क्लब नाप याःगु सम्झौताया कारणं अनन्तं जारी लिगय् आतक छगू नं कासा म्हिते मखंगु खः ।

अनन्तं नेपाःया निगू चर्चित क्लब थ्री स्टार व मनाङ मस्र्याङदी क्लबपाखें सम्झौता यानातःगु खःसा थ्व हे कारणं जारी लिग म्हितेगुपाखें बञ्चित जुइमालाच्वंगु खः । जारी लिगय् नं आः थुपिं हे निगू क्लब उपाधिया निंतिं दावेदारकथं न्ह्यःने वयाच्वंगु दु । निगुलिं क्लबं अनन्तं थःगु क्लबपाखें सम्झौता याःगु दावी यायेवं लिग म्हितेगुपाखें द्याकाच्वनेमाःगु खः ।

अनन्तं थगुने थ्री स्टार क्लबपाखें मोफसला फुटबल कासा म्हितूगु खः, तर थगुने लिग फुटबल धाःसा मजू । अनन्तं थ्री स्टार क्लबलिसेया सम्झौता सिमधनीवं थुगु दँय् लिगया निंतिं मनाङ मस्र्याङदी नापं सम्झौता यायेवं थ्व विवाद पिहां वःगु खः । एन्फाया नियमावलीकथं छम्ह कासामिं निगू क्लबपाखें सम्झौता यात धाःसा दछितक फुटबल म्हिते मखनीकथं कारवाही यायेगु व्यवस्था दु । निगू क्लबपाखें याःगु सम्झौताया कारणं समस्या वःगु एन्फया प्रवक्ता किरण राईं कनादिल ।