प्लास्टिक नयाः ह्वेल सित

दक्षिणी थाइल्यान्डय् प्लाष्टिकया म्हिचा नःम्ह छम्ह ह्वेल सीगु दु । उम्ह ह्वेलं ८० पा प्लाष्टिकया म्हिचा नयातःगु खः । सोङख्ला प्रान्तया छगू नहरय् उम्ह ह्वेलयात बचे यायेगु कुतः याःबलय् वं न्यापा प्लाष्टिकया म्हिचा बान्ता यानाहःगु खँ संरक्षण अधिकारीतय्सं धाःगु दु ।उम्ह ह्वेलया प्वाथय् ८ केजीया प्लाष्टिकया म्हिचा लुइकूगु खः । नौसेनाया छम्ह विज्ञं धाःकथं प्लाष्टिकया म्हिचाया कारणं उम्ह ह्वेलं थःगु आहार नये मफयाः सीगु खः ।

थाइल्यान्डय् विश्वय् हे यक्व प्लाष्टिकया म्हिचा छ्यलीगु देय् मध्ये छगू लाः । छगू अध्ययन कथं आः नं प्लाष्टिकयात नियन्त्रण यायेगु ज्या मन्ह्याकल धाःसा छगू दशक लिपा समुद्रय् प्लाष्टिकया मात्रा स्वंगू गुणां मल्याक अप्वइगु खँ खनेदुगु दु ।
थाइल्यान्डय् प्लाष्टिकया कारणं दँय्दसं सलंसः समुद्री जीव सिनाच्वंगु दु ।

आः सीम्ह ह्वेलयात ना थापय् च्वंगु छगू नहरय् असक्त व लखय् म्हितेमफुगु अवस्थाय् लुइकूगु खः । वातावरण अधिकारीतय्सं डुङ्गाया ग्वाहालिं उम्ह ह्वेलयात पौडी म्हितकेत ग्वाहालि याःगु खः, अले निभालं बचे यानातःगु खः । तसकं स्याहारसुसार यानातःसां ह्वेलसीगु खः ।