ने. सं. ११४३ तछलाथ्व द्वादशी -

डोन्बासय् रुसया भिषण आक्रमण

एजेन्सी- रुसं युक्रेनया पूर्वय्लाःगु डोन्बास क्षेत्रय् भिषण आक्रमण सुरु याःगु दु । युक्रेनी राष्ट्रपति भोलोदिमिर जेलेन्स्कीं रुसी फौजं थःपिंसं अनुमान यानागु स्वयां तःधंगु स्तरं अक्रमण याःगु खँ धाःगु दु ।

छगू टेलिभिजन सम्बोधनय् जेलन्स्कीं रुसं डोन्बासया आक्रमणय् तःधंगु ल्याखय् सेना खटे याःगु खँ धाःगु दु । ‘रुसं न्ह्याक्व हे सेना हःसां छुं मदु, जिपिं ल्वाना हे च्वने, जिमिसं थःगु प्रतिरक्षा याना हे च्वन’ जेलेन्स्कीं धाःगु दु ।

डोन्बासय् लाःगु लुहान्स्कया गभर्नरं छुं शहरय् निरन्तर आक्रमण जुयाच्वंगु व आः अनया स्थिति नर्क थें जूगु धाःगु दु । डोन्बासय् जूगु आक्रमणयात रुसं न्ह्याकूगु निगूगु चरणया युद्धया सुरुवात कथं कयाच्वंगु दु ।

मेखे सोमवाः युक्रेनया मेमेगु शहरय् रुसी सेनां कयेकूगु बमय् लानाः गुम्हेसिया ज्यान वंगु दु । रुसं युक्रेनया सैन्य बन्दोबस्ती केन्द्रय् आक्रमण यानागु धाःगु दु ।

थ्वहे दथुइ युक्रेनी अधिकारीतय्सं रुसी सेनाया घेराबन्दीइ लानाच्वंगु बन्दरगाहया शहर मारिऊपोलय् च्वंगु छगू स्टिल कारखानाय् च्वनाच्वंपिं युक्रेनी सेना व सर्वसाधारणयात रुसं विध्वंसक बमं आक्रमण याःगु द्वपंबिउगु दु । मारिऊपोलया नगरपरिषद्या कथं थ्व भूमिगत आश्रयस्थलय् द्वःछिम्हं मल्याक सर्वसाधारण नं दु ।

मारिऊपोलय् ल्यनाच्वंपिं युक्रेनी सेनाया अन्तिम पुचःया प्रमुखं सर्वसाधारण व घाःपाः जूपिं सैनिकतय्त सुरक्षित पिहां वनेगु लँ चायेकाबीत छगू भिडियोपाखें अपील याःगु दु । थनं थानाच्वंपिं मनूतय्त पिने छ्वयेगु खँय् युक्रेन व रुसी सेना दथुइ निन्हु न्ह्यवनिसें छुं सहमति जुइ फयाच्वंगु मदुनि ।