गोलाइन हाइट इजरायली जूगु घोषणां सउदी अरेबिया तम्वल

गोलान हाइट्स इजरायलया सार्वभौमिक क्षेत्रय् लाः धकाः अमेरिकी राष्ट्रपति डोनाल्ड ट्रम्पया धापूयात कयाः साउदी अरेबियां विरोध प्वंकूगु दु । अमेरिकी राष्ट्रपतिया थ्व धापुतिं अन्तर्राष्ट्रिय कानूनया उल्लंघन जूगु खँ साउदी अरेबियां धाःगु दु । सोमवाः इजरायली प्रधानमन्त्री बेन्जामिन नेतान्याहुया उपस्थितिइ ह्वाइट हाउसय् राष्ट्रपति ट्रम्पं सिरियाया प्रभुत्व दुगु गोला हाइट्स इजरायलया सार्वभौमिक क्षेत्र खः धयासें मान्यता बिसें हस्ताक्षर याःगु खः ।

सन् १९६७य् खुन्हुया युद्ध लिपा सिरियाया उगु भूमिइ इजरायलं कब्जा याःगु खः । थ्व भूभाग आः नं इजरायलया कब्जाय् हे दनि ।अमेरिकाया थ्व निर्णयं भविष्यय् मध्यपूर्वया शान्ति प्रक्रिया व सुरक्षा स्थायित्वय् नकारात्मक लिच्वः लाकीगु खँ साउदी अरेबियां धाःगु दु ।

ह्वाइट हाउसय् राष्ट्रपति ट्रम्पं थ्व मान्यताय् हस्ताक्षर यायेधुंकाः हस्ताक्षर ज्याझ्वलय् नापं दीम्ह इजरायली प्रधानमन्त्री नेतान्याहुं थःगु देया भलो चाहे जूपिं मध्ये छम्ह ट्रम्प नं जूगु खँ धाःगु दु । गोलान हाइट्सयात इजरायली क्षेत्रया मान्यता बीकेगु निंतिं नेतान्याहुं ताःई न्ह्यवनिसें राष्ट्रपति ट्रम्पयात इनाप याना वयाच्वंगु खः ।

नेतान्याहुया अमेरिकी भ्रमण मंगलवाःया ज्याझ्वः दुगु खःसां गाजा क्षेत्रय् रकेट प्रहारी जुइवं वय्कः इजरायल लिहां झायादीधुंकूगु दु । वय्कः छुं घौ जक अमेरिकाय् च्वनाः राष्ट्रपति ट्रम्पं हस्ताक्षर यायेधुंकाः स्वदेश लिहां झायादीगु खः ।