ब्रेक्जिट विवाद प्रधानमन्त्री जोनसनं इयु अध्यक्ष नापलाइगु

बेलायती प्रधानमन्त्री बोरिस जोनसनं कन्हय् सोमवाः ब्रसेल्सय् युरोपेली संघं पिहां वनेगु खँय् छगू महत्वपूर्ण भेटघाट यायेत्यंगु दु । ब्रेक्जिटया विषयय् थः प्रधानमन्त्री जुइधुंकाः यानाच्वंगु कुतःया झ्वलय् वय्कलं थ्व महत्वपूर्ण भेटघाट यानादीत्यंगु खः । युरोपेली संघया अध्यक्ष माइकल बार्नियरलिसे सोमवाः भेटघाट यायेगु बारे प्रधानमन्त्री जोनसनं शुक्रवाः छगू ज्याझ्वलय् जानकारी बियादीगु खः ।

वय्कलं युरोपेली आयोगया अध्यक्ष जिन क्लाउड जंकरयात नं नापलानाः ब्रेक्जिटबारे आवश्यक परामर्श यानादीत्यंगु दु । थुगु भेटवार्ताय् थःम्ह गुकथं ज्या याना च्वनागु व वइगु दिनय् थुकिं गज्याःगु लिच्वः लाकी धयागु बारे आवश्यक परामर्श यायेगु वय्कःपिंत जानकारी बीगु खँ प्रधानमन्त्री जोनसनं धयादीगु दु ।

शुक्रवाः छगू ज्याझ्वलय् सम्बोधन यायेगु झ्वलय् वय्कलं धयादीगु दु, ‘जि थ्व ज्याय् आशावादी दु । जितः ताः बेलायत युरोपेली संघपाखें पिहां वइ । जिमिसं क्वःछिनातयागु वइगु अक्टोवर ३१ तकया दुने झी पिहां वयेगु जुइ ।’वय्कलं थुकी अझ बः बियाः धयादीगु दु, ‘न्ह्यागु न्ह्याथे जूसां झीगु क्वःछिनातयागु २०१९ अक्टोबर ३१ या तिथि दुने युरापेली संघपाखें पिहां हे वयेगु जुइ ।’

मेखे आःया परिस्थितिइ प्रधानमन्त्री जोनसनयात बेक्जिटया ज्या यायेत धाःसा तसकं थाकुइगु अवस्था दु । बेलायती व युरोपेली सञ्चारमाध्यमतय् विश्लेषण दु, ‘थुकिया निंतिं वय्कलं यक्व खँ मिले याये मानि व यक्व स्वयां यक्व संघर्ष यायेमालिगु खनेदु ।’
बे्रक्जिटया निंतिं बेलायती प्रधानमन्त्री जोनसनं अझ नं संघर्ष यानाच्वंगु दनि ।

छुं वाः न्ह्यव जक वय्कः युरोपेली संघं बेलायतयात पित हयेगु ज्या पूवंकेगु संकल्प सहित प्रधानमन्त्री जुयादीगु खः ।मेखे ब्रेक्जिटया निंतिं वय्कलं यानातःगु ज्यायात कयाः धाःसा बेलायतय् तःधंगु विरोध जुयाच्वंगु दु । वय्कलं बेलायती संसद हे भंग यानाबिउगु निर्णय सर्वोच्च अदालत तक थ्यनाच्वंगु दु ।

स्कटल्यान्डया उच्च अदालतं वय्कःया थ्व निर्णय गलत जूगु फैसला न्यंकेधुंकूगु दु । अक्टोवर १४ तक निंतिं निलम्बन यानातःगु संसदया अधिवेशन याकनं सःतेत विपक्षीतय्सं तच्वःगु दबाब बियाच्वंगु दु । अथेहे वय्कलं बेक्जिटया निंतिं हयाच्वंगु प्रस्तावयात वय्कःया थःगु हे पार्टीया गुलिखे सांसदतय्सं तकं अस्वीकार यानाच्वंगु दु ।