ने. सं. ११४६ दिल्लागा द्वादशी -

सुकुम्बासीतय्त उमिगु हे जिल्लाय् व्यवस्थापन याइगु

येँ (नेपालभाषा टाइम्स) – सरकारं स्वनिगःया सुकुम्बासी बस्तीइ च्वनाच्वंपिंत उमिगु हे सम्बन्धित जिल्लाय् व्यवस्थापन यायेगु ज्या न्ह्याकूगु दु ।

भूमि समस्या समाधान समितिं स्वनिगलय् च्वना वयाच्वंपिं विस्थापित सुकुम्बासीतय् स्थायी ठेगाना दुगु जिल्लाय् हे व्यवस्थापन यायेगु प्रक्रिया न्ह्याकूगु खः । सरकारं नीस्वंगु समितिं वंगु साउन ४ गते ३५ न्हुया सुचं जारी यासें दलित व भूमिहीन सुकुम्बासीतय्त निवेदन बीत इनाप याःगु खः ।

थ्व स्वयां न्ह्यः नं तःक्वः निवेदन संकलन यानागु व आः स्वक्वःगु खुसिइ वास्तविक सुकुम्बासीयात कःघायेत सुचं पिथनागु खँ समितिया सूचना अधिकारी लिसें नापी अधिकृत सञ्जीवकुमार साहं धयादीगु दु । साहं थ्व सुचं होल्डिङ सेन्टरय् च्वनाच्वंपिनिगु निंतिं जक मखुसे देय्न्यंकंया सुकुम्बासीया निंतिं जूगु खँ धयादीगु दु । लिसें वय्कलं थ्व स्वयां न्ह्यः निवेदन बीधुंकूपिनिगु हकय् गृह जिल्लाय् हे व्यवस्थापन यायेगु प्रक्रिया न्ह्यायेधुंकूगु जानकारी नं बियादीगु दु ।

वय्कःया कथं स्वनिगलय् एकीकृत बागमति सभ्यता विकास समितिं थ्व स्वयां न्ह्यः संकलन याःगु सुकुम्बासीया विवरण उमिगु स्थायी बसोबास दुगु स्थानयि तह व जिल्लाय् छ्वयेगु ज्या जुयाच्वंगु दु । आः तक २६ म्हेसिया निवेदन सम्बन्धित स्थानीय तहलय् छ्वयेधुंकूगु जानकारी नं वय्कलं बियादीगु दु ।

स्वनिगःया फुक्क धयाथें नगरपालिकां सकुम्बासीया स्थायी व्यवस्थापन यायेगु निंतिं जग्गा मदुगु जानकारी सरकारयात याकेधुंकूगु दु । थ्व लिपा सरकारं सम्बन्धित जिल्लाय् व्यवस्थापन यायेगु तयारी न्ह्याकूगु खः । तर स्वनिगःया थीथी थासय् च्वनाच्वंपिं सुकुम्बासीतय्सं धाःसा स्वनिगः त्वःताः वनेगु पक्षय् मदु ।

समितिया कथं थौंकन्हय् देय्न्यंक ३ लाख भूमिहीन सुकुम्बासी व ९ लाख ५० हजार अव्यवस्थित बसोबासीं निवेदन बिउगु दु । उकी मध्ये येँय् जक २ हजार ६ सय सुकुम्बासीं नां दर्ता यायेधुंकूगु दु ।

उमित व्यवस्थापन यायेगु निंतिं स्वनिगःया पालिकाय् जग्गा मदुगुलिं सम्बन्धित जिल्लाय् व्यवस्थापन यायेगु निंतिं पौ च्वयेगु ज्या नं जुइधुंकूगु जानकारी वय्कलं बियादीगु दु ।