छ्यंया मू ५० लाख तयातःम्ह भारतीय माओवादी नेता प्रहरी मुडभेडय् सित

एजेन्सी- भारतया महाराष्ट्रया गडचिरोला जिल्लाय् प्रहरी व भारतीय माओवादी दथुइ जूगु ल्वापुइ छ्यंया मू ५० लाख तयातःम्ह भारतीय माओवादी नेता मिलिंद तेलबुंडे लिसें २६ म्ह माओवादी सीगु दु । सीपिं मध्ये २० म्ह मिजं व खुम्ह मिसा दु । घटनाय् प्यम्ह प्रहरी गम्भीर घाःपाः जूगु दु ।

आइतवाः महाराष्ट्र प्रहरीं थ्व जानकारी बिउगु खः । प्रहरीया कथं सी–६० कमान्डों शनिवाः याःगु सर्च अपरेसनय् भिडन्त जूगु खः । प्रहरी ९ गू एसएलआर व ५ गू एके ४७ सहित २९ गू ल्वाभः नं बरामद याःगु दु ।

भारतीय माओवादी नेता मिलिंदयात प्रहरीं मालाच्वंगु खःसा वयागु छ्ंयया म्र ५० लाख भारु तयातःगु खः । महाराष्ट्रय् हिंसात्मक गतिविधि यायेगुलि मिलिंदया ल्हाः दुगु प्रहरीं धाःगु दु । सन् १९९६ निसें वयात मालाच्वंगु खः ।