भाषा व लिपि विषयय् अन्तरक्रिया

येँ (नेपालभाषा टाइम्स) – नेपालभाषा व नेपाल लिपिया विषयय् छगू अन्तरक्रिया ज्याझ्वः जुल । ज्यापु महागुथि नेपाःया ग्वसालय् व येँ महानगरपालिकाया आर्थिक ग्वाहालिइ नेपालभाषा, नेपाल लिपि व मौलिक व अमूर्त सांस्कृतिक सम्पदा क्वचाखिं बाजंयात कयाः उगु अन्तरक्रिया जूगु खः ।

गुथिया नायः सत्यनारायण डंगोलया सभापतित्वय् जूगु ज्याझ्वलय् ‘नेपालभाषा म्हिगः, थौं व कन्हय्’ विषयय् लोककवि राजभाई जकःमिं ज्यापौ न्ह्यब्वयादीगु खः । थुकथं हे ‘नेपाल लिपिया इतिहास, विकास व वर्तमान अवस्था’ विषयय् राधेश्याम महर्जनं ज्यापौ न्ह्यब्वयादीगु खःसा क्वंचाखिं व बय्या थीथी खँ धर्म मुनिकारं न्ह्यब्वयादीगु खः ।

गुथिया न्हापांम्ह न्वकु मचाराजा महर्जनं भाय् व लिपि तना वनकि झीगु मौलिकता नं मदया वनीगु जुयाः थुकियात पुस्तान्तरण याना वनेमाःगु खँय्‌ बः बियादिल ।

ज्याझ्वलय् बाजं गुरु मुनिकारं क्वंचाखिं व बय्‌या अन्तर सम्बन्धलिसें उकिया भिन्नता, विशेषता, सैद्धान्तिक व व्यावहारिक पक्षयात कयाः स्पष्ट यानादीगु खः ।