महतया मुद्दा मुल्तबीइ मतइगु

येँ (नेपालभाषा टाइम्स) – पोखरा अन्तर्राष्ट्रिय विमानस्थल दयेकेगु झ्वलय् जूगु भष्टाचार प्रकरणय् स्वाम्ह पुलांम्ह अर्थमन्त्री डा. रामशरण महतया मुद्दा तत्काल मुल्तबीइ तयेत विशेष अदालतं अस्वीकार याःगु दु । डा. महतया जहान रोशनी महतं थः जहान गम्भीर मानसिक ल्वय् ‘फ्रन्ट टेम्पोरल डिमेन्सियां’ पीडित जुयाः शारीरिक व मानसिक रुपं अशक्त जुयाच्वंगु धासें मुद्दा स्थगित यायेत निवेदन बिउगु खः । विशेष अदालतया न्यायाधीशपिं हेमन्त रावल, डिल्लीरत्न श्रेष्ठ व उमेश कोइरालाया मंकाः इजलासं म्हिगः उगु निवेदनयात कयाः सुनवाइ यासें आःयात मुद्दा मुल्तबीइ तयेम्वाःगु आदेश बिउगु खः । अदालतया आदेशय् डा. महतया स्वास्थ्य अवस्था गम्भीर दुगु खँयात पूर्णतः उपेक्षा धाःसा याःगु मदु ।