शिक्षा व स्वास्थ्यया समता कर लितकाल
अर्थमन्त्रीं बजेटय् तःगु कर प्रधानमन्त्री लित कायेगु घोषणा
येँ (नेपालभाषा टाइम्स) – सरकारं निजी शिक्षा व स्वास्थ्य स्वास्थ्य सेवाय् लागू याःगु ३ प्रतिशत समता कर लित कायेगु निर्णय याःगु दु । आर्थिक दँ २०८३/८४ या बजेटय् घोषणा यानाः वंगु साउन १ गते निसें कार्यान्वयनय् हःगु थ्व करयात कयाः देय्न्यंकं विरोध जुइवं प्रधानमन्त्री बालेन शाहं थ्व कर मकायेगु निर्णय याःगु खः । अर्थमन्त्री स्वर्णिम वाग्लें बजेटय् हःगु करयात कयाः सामाजिक सञ्जालय् तच्वःगु विरोध जुया वयाच्वंगु खः ।
प्रधानमन्त्री बालेन शाहं मंगलवाः थःगु फेसबुकय् छगू पोस्ट यासें शिक्षा समता कर व स्वास्थ्य समता कर आःया निंतिं लागू मयायेगु निर्णय यानागु खँ धाःगु खः । शिक्षा व स्वास्थ्य क्षेत्रय् लागू याःगु ३ प्रतिशत कर तत्काल कार्यान्वयन यायेबलय् आम नागरिकतय्त थप भार फयेमाःगु व आम जनताया दथुइ निराशा अप्वइगु खनेदुगुलिइ अर्थमन्त्री स्वर्णिम वाग्लेलिसे सहलह यानाः कर मकायेगु निर्णय यानागु खँ प्रधानमन्त्री शाहं थःगु पोस्टय् न्ह्यथनातःगु दु ।
प्रधानमन्त्री शाहया कथं समता शुल्कया उद्देश्य दुर्गम व लिउने लाःगु क्षेत्रया नागरिकतय्त गुणस्तरीय शिक्षा व स्वास्थ्य सेवा बीगु, दलित, सिमान्तकृत व विपन्न मस्तय्त ग्वाहालि यायेगु, स्वास्थ्य बीमा विस्तार यायेगु व उकिया निंतिं आर्थिक स्रोत मुंकेगु निंतिं खः । वय्कलं करया दायरा विस्तार यानाः अर्थतन्त्रयात थप व्यवस्थित दयेकेगु आज्जु नं दुगु खँ सामाजिक सञ्जालय् याःगु पोस्टय् धयातःगु दु ।
प्रधानमन्त्री शाहं समता करयात कयाः नागरिक तहपाखे वःगु प्रतिक्रियाय् सरकार गम्भीर जूगु धासें नागरिकया हितयात केन्द्रय् तयाः निर्णय यायेगु व माल धाःसा सुधार व परिमार्जन यायेत सरकारं न्ह्याबलें तयार दुगु खँ नं धयातःगु दु । शुल्क मकायेगु निर्णय सम्बन्धित विभागीय मन्त्रालय वा मन्त्रीपाखे वयेमाःगु खःसां नं प्रधानमन्त्रीपाखे वःगु खँयात कयाः अर्थपूर्ण रुपय् काःगु दु ।
छुं न्हिं न्ह्यवंनिसें प्रधानमन्त्री शाह व अर्थमन्त्री वाग्ले दथुइ तालमेल मिले मजुयाच्वंगु खँ चर्चा जुयाच्वंगु इलय् प्रधानमन्त्रीपाखें जूगु थुगु घोषणां निम्ह नेता दथुइ खँ मिले मजू धयागु खँयात अझ बः बिउगु दु । अझ प्रधानमन्त्री थौंकन्हय् थीथी व्यापारिक संघसंस्थाया प्रतिनिधितय्त नापलायेगु ज्या यानाच्वंगु इलय् सम्बन्धी विभागीय मन्त्रीया ल्याखं अर्थमन्त्री नं नापं तयेमाःगु खःसां अर्थमन्त्रीयात हे मतसे खँल्हाबल्हा न्ह्याकाच्वंगुलिं नं प्रधानमन्त्री व अर्थमन्त्री दथुइ विवाद तच्वया वनाच्वंगु चर्चा जुयाच्वंगु दु । थ्वहे दथुइ प्रधानमन्त्री साहं फयांफछि अर्थमन्त्री हिलेगु संकेत पार्टी सभापति लामिछानेयात बीधुंकूगु चर्चा नं दु ।
प्रधानमन्त्री शाहया कर मकायेगु घोाषणायात नेपाली कांग्रेसया सभापति गगन थापां लसकुस यासें मतय् तयातःगु भ्याट नं चीकेत इनाप यानादीगु दु ।
LEAVE YOUR COMMENTS