ठेकेदारं पुजाज्वलं महःगुलिं तलेजुया पुजा लिबात
येँ (नेपालभाषा टाइम्स) – इलय् पुजा सामग्री वयेगु लिबायेवं म्हीग तलेजु भवानीया पुजा यायेगु ज्या लिबाःगु दु । ठेकेदारं इलय् पुजा सामाग्री हया मबीवं पुजा यायेगु ज्या लिबाःगु खँ तलेजुया पुजारी उद्धव कर्माचार्य ‘नेपालभाषा टाइम्स’ यात कनादीगु दु ।
वय्कःया कथं म्हीग सुथय् ८ बजे त्रिबली पुजा यायेगु तयारी जूगु खःसां नं बलि बीत माःगु मेय्, दुगु व हँय् इलय् महयेवं पुजा बीगु ज्या लिबाःगु खः ।
ठेकेदारं म्हीग सुथय् बलीया निंतिं माःगु सामग्री थ्यंकेमाःगु खःसा नं बहनी ९ बजे तिनि सामग्री थ्यंगु जानकारी पुजारी कर्माचार्यं बियादीगु दु । उगु इलय् गुथि संस्थान केन्द्रीय कार्यालय प्रमुखयात फोन यानाः नं फोन मल्ह्वंगु जानकारी नं वय्कलं बियादीगु दु ।
इलय् पुजा सामग्री थ्यंकेगु दायित्व गुथि संस्थानया जूगुलिं म्हिगः हे गुथि संस्थानया कार्यालय प्रमुख हरिप्रसाद सुवेदीयात नापलानाः पुजाय् जूगु विलम्बया बारे जानकारी याकागु खँ वय्कलं धयादीगु दु ।
उगु इलय् गुथि संस्थान प्रमुख सुवेदी व ठेकेदार दथुइ सल्लाह यानाः इलय् पुजा सामग्री थ्यंकेगु खँय् सहमति यायेगु कुतः जूगु खःसां नं ठेकेदार कम्पनीया प्रतिनिधिं हस्ताक्षर यायेत माने मजूगु जानकारी नं वय्कलं बियादीगु दु ।
गुथि संस्थानया प्रमुख सुवेदी पुजा सामग्री इलय् थ्यंकेत छुं ई लिबाःगु खँ स्वीकार यासें ठेकेदार कम्पनीं गल्ती याःगु व आवंलि उकथं गल्ती मयायेत सचेत यानागु खँ ‘नेपालभाषा टाइम्स’ यात कनादीगु दु ।
म्हीग न्हिनय् २ बजे क्वचायेमाःगु पूजा चान्हय् २ बजे तिनि क्वचाःगु जानकारी नं कर्माचार्य बियादीगु दु । म्हीग तलेजुइ षष्ठी पुजा यायेगु ज्या जूगु खःसा कन्हय् नं तलेजुइ थापुजा धकाः त्रिबली पुजा जुइ ।
कन्हय् पुजाया निंतिं थौं हे गुथि संस्थानयात जानकारी याकेगु व इलय् पुजा सामग्री मथ्यन धाःसा थःपिं संस्कृति मन्त्रालयय् हे वनाः जानकारी याकेगु तयारी जुयाच्वंगु खँ नं कर्माचार्यं कनादीगु दु ।
LEAVE YOUR COMMENTS