अमेरिकी पुचः उत्तर कोरियाय्

अमेरिकी राष्ट्रपति व उत्तर कोरियाली नेता दथुइ शिखर वार्ता याकेगु निंतिं सहलह यायेत छपुचः अमेरिकी अधिकारी उत्तर कोरिया थ्यंगु दु । उत्तर कोरिया थ्यंगु अमेरिकी पुचलं परमाणु निशस्त्रीकरणया विषयय् केन्द्रीत जूगु खँ धाःगु दु । अमेरिकी पुचलं राष्ट्रपति डोनाल्ड ट्रम्प व उत्तर कोरियाली नेता किम जङ अन दथुइ शिखर वार्ता याकेगु निंतिं नं सहलह जुइगु खँ धाःगु दु ।

अमेरिकी विदेश मन्त्रालयया कथं उत्तर व दक्षिण कोरियाया सीमा क्षेत्रय् असैनिकृत क्षेत्र पान्मुन्जोम पारिइ च्वंगु उत्तर कोरियाली भूभागय् निगुलिं देय्या अधिकारीतय् दथुइ सहलह जुयाच्वंगु खः । अमेरिकी टोलीया नेतृत्व दक्षिण कोरियाया निंतिं पुलांम्ह अमेरिकी राजदूत सुङ किमं यानाच्वंगु दुसा उत्तर कोरियाया नेतृत्व उपविदेशमन्त्री चोए सोन हुइं यानाच्वंगु दु ।

राष्ट्रपति ट्रम्प व उत्तर कोरियाली नेता किम दथुइ शिखर वार्ता जुल धाःसा परमाणु निसशस्त्रीकरणं हे विशेष प्राथमिकता काइगु खँ धाःगु दु । राष्ट्रपति ट्रम्प व नेता किम दथुइ जुन १२ य् सिंगापुरय् वार्ता जुइगु क्वःछिनातःगु खःसां ट्रम्पं थ्व वार्ता त्वाःथला बीधुंकूगु दु । आः हाकनं निम्ह नेतातय् दथुइ वार्ता याकेगु निंतिं थ्व तयारी जुयाच्वंगु खः ।

सम्बन्धित बुखँ

LEAVE YOUR COMMENTS