चीनय् पूवंक संरक्षित अवस्थाय् डाइनोसोरया भ्रूणलुइकल

एजेन्सी- माखां कुकु च्वनीबलय् खनेदइम्ह खाचा थेंज्याःगु अव स्थाय् डाइनोसरया पूवंक संरक्षित अवस्थाया भ्रूण लूगु खँ वैज्ञानिकतय्सं धाःगु दु । थ्यंमथ्यं खुगू करोड ६० लाख दँ पुलांगु अनुमान यानातःगु थ्व भ्रूण दक्षिण चीनया गान्जोय् लुइकूगु खः ।
थ्व ‘टुथलेस थीरपोड डाइनासोर’ वा ‘ओभारटोरसोर’या भू्रण जुइमाः धकाः अनुमान यानाच्वंगु दु । थ्व भ्रूणयात आः ‘बेबी यिङगलियाङ’ धकाः नां छूगु दु ।

अनुसन्धानकर्ता डा. फिओन वाइसम मालें थ्व भ्रूण आःतक लूगु मध्य दकलय् बांलाःगु डाइनोसरया भ्रूण जूगु खँ धयादीगु दु । थ्व खोजं डाइनोसोर व आधुनिक पंक्षीतय् दथुया सम्बन्ध बारे अझ अप्वः जानकारी मुंकेफइगु खँ अनुसन्धानकर्तातय्सं धाःगु दु ।

खाचा खेँचं पिहां वये न्ह्यः गुकथं च्वनाच्वनीगु खः, अज्याःगु हे डाइनोसोरया भ्रूणया जीवाष्म लुइकूगु खः । डा. मालें थुकिं आधुनिक पंक्षीतय्के थज्याःगु व्यवहार उमिगु डाइनासोर पूर्खापाखें विकसित व उत्पत्ति जूगु धयागु संकेत यानाच्वंगु खँ धयादीगु दु ।

अनुसन्धान पुचलय् दुथ्याःम्ह प्रा. स्टिभ बु्रसाटीं छगू ट्विट यासें थःम्हं आःतक खनागु मदये दकलय् आश्चार्यजनक डाइनासोरया जीवाष्म मध्ये छगू जूगु खँ धयादीगु दु ।

थ्व भ्रूणया नाप छ्यनं निसें न्हिप्यंतक २७ सेन्टिमिटर ताःहाकः दुगु खँ धाःगु दु । थ्व भ्रूण चीनय् च्वंगु यीङगलियाङ्ग स्टोन नेचर हिस्ट्री म्युजिमय् च्वंगु ६.८ इन्च ताःहाकःगु ख्येँय् लुइकूगु खः ।

सम्बन्धित बुखँ

LEAVE YOUR COMMENTS