सान्दर्य धेंधेंबल्लाःया इलय् नांगां तःगु द्वपं

एजेन्सी- मिस युनिभर्स इन्डोनेशियाय् सहभागी छुं मिस्तय्सं थःपिंत यौन दुव्र्यवहार जूगु धासें प्रहरीइ उजुरी तःगु दु । उजुरी बिउपिं प्रतियोगीतय् वकिलं मू ज्याझ्वः जुइ निन्हु न्ह्यः उमित आयोजकतय्सं ‘म्हया जाँच यायेगु व किपा कायेमाःगु’ धासें जँ च्वय् निर्वस्त्र तःगु खँ धाःगु दु ।

इन्डोनेशियाया जाकार्ताय् थ्व धेंधेंबल्लाः वंगु अगस्त ३ य् जूगु खः । थ्व धेंधेंबल्लाःया निंतिं म्हय् सेल्युलाइट (छ्यंगू कय्कुंगु थें च्वंक छ्यंगू क्वय् दइगु दाः) व ट्याटु तयातःगु दु कि मदु स्वये धासें निवस्त्र याकूगु खँ धाःगु दु ।

सञ्चारकर्मीतलिसे खँ ल्हासें छम्ह प्रतियोगी थःपिनिगु अधिकारया उल्लंघन जूगु थें ताःगु खँ धाःगु दु । मेपिं निम्ह प्रतियोगितलिसे दुम्ह उम्ह प्रतियोगीं धाःगु दु, ‘थुकिं जितः मानसिक पीडा बिउगु दु, जि बांलाक द्यने तकं मफुनि ।’

छगू स्थानीय टेलिभिजनं उमिगु म्हसीका सीमदइ कथं ख्वाः नं बुलुक तयाः उमिगु बारे समाचार पितबिउगु दु । उजुरी बिउपिं स्वम्ह प्रतियोगीतय् वकिल मेलिसा आङ्ग्रेनीं मेपिं प्रतियोगितय्सं नं थ्व बारे याकनं न्ववाइगु खँ धाःगु दु ।

थ्व उजुरी लायेवं जाकार्ताया प्रहरीं छगू विज्ञप्ति पिकासें घटनाया अनुसन्धान जुइगु धाःगु दु । अथेहे थ्व धेंधेंबल्लाःगु याइगु संस्था मिस युनिभर्स इन्डोनेशिया अर्गनाइजेशनया थुवाः पपी क्यापेलां नं थ्व द्वपंयात कयाः छानविन यायेगु प्रतिबद्धता प्वंकूगु दु । क्यापेला इन्डोनेशियाया लोकंह्वाःम्ह गायिका व व्यापारी खः । यौन दुव्र्यवहार लिसे सम्बन्धित द्वपं तसकं गम्भीर धासें अर्गनाइजेशनं थुकिया छानविन न्ह्याकेधुनागु धाःगु दु ।

पुलांम्ह मिस इन्डोनेशिया मारिया हर्फान्तीं थज्याःगु धेंधेंबल्लाःया इलय् प्रतियोगितय् म्ह जाँच याइगु सामानय खःसां सहभागीपिंत निर्वस्त्र धाःसा मयाइगु खँ धाःगु दु । सोमवाः जूगु पत्रकार सम्मेलनय् छम्ह उजुरीकर्तां थःपिंत छगू क्वथाय् तयाः म्ह जाँच याःगु व उगु इलय् मिजंत नं अन दुगु खँ धाःगु दु । अथेहे क्वथा पूवंक बन्द मजूगुलिं मेपिंसं नं पिनें स्वयेफुगु खँ धाःगु खः ।