ब्रेक्जिट सकमित, इयुपाखें शर्तत अनुमादन

युरोपेली संघ (इयु)य् आवद्ध नीन्हय्गू राष्ट्रं बेलायत लिसे जुइगु ऐतिहासिक ब्रेक्जिट सम्झौताया शर्तत ब्रसेल्सय् जूगु छगू विशेष सम्मेलनं अनुमोदन याःगु दु । इयुया दुजः देय्तय्सं युरापेली संघपाखें बेलायतया बहिर्गमन सम्झौता सम्बन्धी सहमति व ब्रेक्जिट लिपा इयु व बेलायत दथुया सम्बन्ध बारे राजनीतिक घोषणायात अनुमोदन याःगु खः ।

थुकिया पुष्टि इयु काउन्सिलया प्रमुख डोनाल्ड टस्कं ट्विटपाखें यानादीधुंकूगु दु ।बे्रक्जिटयात सन् २०१९ मार्च ३० निसें कार्यान्वयनय् यंकेगु निंतिं आवश्यक पलाः छीत परिषदं इयुया फुऽ संघ संस्थायात सहलहया निंतिं सःतूगु दु । बेलायत मार्च २९य् इयुपाखें पिहां वनेत्यंगु दु ।
सहमतिं बेलायत व इयुया भविष्यय् कायम जुइगु सम्बन्धया बारे जुइगु राजनीतिक घोषणायात औपचारिक स्वीकृति बीगु ज्या जुइ ।

थ्व सहमतिं व्यापार, सुरक्षा व वातावरण संरक्षणया विषययात नं कःघानाच्वंगु दु । इयु परिषदं धाःगु दु, ‘युरोपेली संघं घोषणा कथं सम्भव दतले बेलायतलिसे सतिक च्वनाः ज्या यायेत दृढसंकल्प याःगु दु ।’ परिषद्या नेतातय्सं इयुया पाखें प्रमुख वार्ताकार मिसेल बार्नियरयात सहमति दयेकेगु निंतिं मदिक्क याःगु कुतःया निंतिं सुभाय नं देछाःगु दु ।