उत्तर कोरियाया ख्याच्वः बारे ट्रम्प व मुन दथुइ टेलिफोन वार्ता

उत्तर कोरियां अमेरिका लिसे जुइगु शिखर वार्ता मच्वनेफुगु ख्याच्वः बिया हयेवं अमेरिकी राष्ट्रपति डोनाल्ड ट्रम्प व दक्षिण कोरिया राष्ट्रपति मुन जाय इन दथुइ टेलिफोन वार्ता जूगु दु । फोन वार्ता उत्तर कोरियायात कयाः हे केन्द्रीत जूगु खँ धाःगु दु ।
अमेरिकां न्हापा जूगु सहमति अःखः संयुक्त सैन्य अभ्यासया विषयय् विवाद हःगु धासें उत्तर कोरियां वार्ता मच्वनेगु ख्याच्वः बिउगु खः ।

अमेरिका लिसेया विवादया हे कारणं उत्तर कोरियां दक्षिण कोरियाया उच्च अधिकारीतय् लिसेया छगू बैठक नं अन्तिम इलय् स्थगित यानाबिउगु दु ।अमेरिका व दक्षिण कोरियाया राष्ट्रपतिय् दथुइ जूगु टेलिफोन वार्ताय् निगुलिं देय् अझ सतिक च्वनाः ज्या न्ह्याकेगु समझदारी जूगु खँ ह्वाइट हाउसं धाःगु दु ।

ट्रम्पयात नापलायेगु निंतिं मंगलवाः दक्षिण कोरियाली राष्ट्रपति मुन अमेरिका वनेत्यंगु दु । दक्षिण कोरिया व अमेरिका दथुइ जुइगु शिखर वार्ता सफल यायेगु वातावरण दयेकेत मुन वाशिंगटन वनेत्यंगु खः । उत्तर कोरियाली नेता किम जोङ उन व अमेरिकी राष्ट्रपति ट्रम्प दथुइ वइगु जून १२ य् सिंगापुरय् शिखर वार्ता यायेगु क्वःछिनातःगु दु ।