प्रतिभा बुक बैंकया स्वीनिक्वःगु बुन्हि व प्रतिभा समाजया साधारण सभा
येँ (नेपालभाषा टाइम्स) – प्रतिभा बुक बैंकं तगिं झिंछगू व झिंनिगूया ब्वनामिपिंत पाठ्यसफू लःल्हाःगु दु । प्रतिभा बुक बैंकया स्वीनिक्वःगु बुन्हि व प्रतिभा समाजया साधारण सभाया झ्वलय् लाकाः सछिं मल्याक ब्वनामिपिंत पाठ्यसफू लःल्हाःगु खः ।
सातोआकी भवनय् शुक्रवाः जूगु ज्याझ्वलय् मूपाहां यल महानगरपालिकाया उपमेयर मञ्जली शाक्य वज्राचार्यलिसें समाजया नायः डा. वज्रराज शाक्य व पदाधिकारीपिंसं सफू लःल्हानादीगु खः । समाजं दँय्दसं सछिम्हं स्वयां अप्वः थीथी ब्वनेकुथिया ब्वनामिपिंत थुकथं निःशुल्क पाठ्यसफू लःल्हायेगु याना वयाच्वंगु दु । झिंछगू तगिंया ब्वँमिपिंत लःल्हाःगु सफू उगु तगिं क्वचायेकाः लित बिलकि हाकनं झिंनिगू तगिंया सफू बीगु यानाच्वनागु खँ समाजया व्यवस्थापक शोभा वज्राचार्यं कनादीगु दु ।
ज्याझ्वलय् न्ववानादिसें मूपाहां वज्राचार्यं सफू धयागु ज्ञानया भण्डार जूगुलिं सफू न्हूगु पुलांगुया अर्थ जुइमखु, उकी दुने दइगु ज्ञानया खँ महत्वपूर्ण जुइ धासें समाजपाखें ब्वनामि मस्तय् प्रतिभायात ब्वलंकेगु निंतिं याःगु ज्यायात ब्वनामिपिंसं नं सम्मानपूर्वक ग्रहण यानाः मेहनत यानाः ब्वनेत इनाप यानादिल । समाजया दुजः डा. पुष्पराज राजकर्णिकारं समाजया स्थापना व समाजं याना वयाच्वंगु ज्याया बारे कनादीगु खः ।
सन् १९९२ य् नेपाःया घोप्टेभीरय् जूगु थाइ एयरवेज दुर्घटना लानाः मदुम्ह जापानी ल्याय्म्ह सातोआकीया लुमन्तिइ प्रतिभा समाज स्थापना जूगु खः । नेपाः चाःहिउ वःम्ह जापानी ल्याय्म्ह विमान दुर्घटनाय् मदयेवं वःगु बीमाया ध्यबांवय्कःया छेँजःपिंसं कुपण्डोलय् सातोआकी भवन दयेकाः प्रतिभा समाजयात लःल्हाःगु खः ।
समाजं साताओकीया लुमन्तिइ दँय्दसं जुलाई ३१ तारिखकुन्हु तगिं ११ व १२ या ब्वनामि मस्तय्त सफू लःल्हायेगु याना वयाच्वंगु दु । अथेहे समाजं मस्तय् प्रतिभा प्रस्फुटन जुइगु चित्रकला लिसें थीथी ज्याझ्वः याना वयाच्वंगु खँ नं डा. राजकर्णिकारं कनादीगु दु ।
ज्याझ्वलय् हरिसिद्धि स्कुल, श्रीचण्डी स्कुल, त्रिपद्म, जगतसुन्दर ब्वनेकुथि, त्रिनिटि, जुबिल्याण्ट, केएमसी स्कुल, दरबार हाईस्कुल, अन्नपूर्ण उ.मा.वि., समृद्धि स्कुल, युनाइटेड एकेदेमि, लक्ष्मी शिक्षा सदन, निस्ट, एभरेष्ट, विश्व निकेतन, पिपल्स,दीपज्योति स्कुलया ब्वँमिपिंत पाठ्यसफू लःल्हाःगु खः ।
प्रतिभा समाजया नायः डा. वज्रराज शाक्या सभापतित्वय् जूगु ज्याझ्वलय् सदस्य सचिव करण नरसिंह शाक्यं लसकुस यानादीगु खः ।
LEAVE YOUR COMMENTS