अमेरिकायात एकताबद्ध यायेगु बाइडेनया प्रतिबद्धता

एजेन्सी – नवनिर्वाचित अमेरिकी राष्ट्रपति जो बोइडेनं देय् यात विभाजित मखु कि एकताबद्ध यायेगु प्रतिबद्धता प्वंकादीगु दु । शनिवाः पेन्सेल्भिनिया व नेभाडाय् त्यायेवं सम्बोधन यासें बाइडेनं जनतां थःत स्पष्ट रुपं विजयी यानाबिउगु धासें सुभाय् देछायादीगु खः । ‘जितः छिकपिंसं क्यनादीगु विश्वासप्रति कृतज्ञ दु’ वय्कलं धयादीगु दु ।

बाइडेन आः वइगु जनवरी २० तारिख कुन्हु अमेरिकाया ४६ औं राष्ट्रपति शपथ ग्रहण यानादी । अमेरिकी चुनावया इतिहासय् दकलय् अप्वः ७ करोड ४० लाख मत कायेत ताःलाःम्ह वय्कलं वर्तमान राष्ट्रपति रिपब्लिकन उम्मेदवार डोनाल्ड ट्रम्पयात पराजित याःगु खः । आःतक वःगु मतगणनाया लिच्वः कथं बाइडेनं २९० इलेक्ट्रोल मत कायेधुंकूगु दुसा ट्रम्पं २१४ जक मत कायेत ताःलाःगु दु । अमेरिकी चुनाव आयोगं बाइडेन विजय जूगु घोषणा मयाःनिसां वय्कलं त्याकादीगु थीथी राज्यपाखें वःगु इलेक्ट्रोल मत कथं वय्कलं ह्वाइट हाउसया नेतृत्व याइगु पक्का जुइधुंकूगु दु ।

विजय लिपा सम्बोधन यासें वय्कलं धयादीगु दु ‘जि विभागन यायेत स्वइम्ह मखु, बरु एकताबद्ध याइम्ह राष्ट्रपति जुइगु बाचा याये । जिं वँचुगु व ह्याउँगु राज्य मखु, केवल संयुक्त राज्य अमेरिका जक खनी ।’ अमेरिकाय् डेमोक्रयाटिक पार्टीं वँचुगु रंग व रिपब्लिकन पार्टीं ह्याउँगु रंग छ्यलेगु याइ ।

आः छु जुइ ?
मेखे मेगु कार्यकालया निंतिं चुनाव त्याकेत असफल जूम्ह वर्तमान राष्ट्रपति डोनाल्ड ट्रम्पं थःगु पराजय स्वीकार याःगु मदुनि । वय्कःया चुनाव अभियान मतगणना विरुद्ध थीथी राज्यय् मुद्दा तयाच्वंगु दु। यदि थ्व मुद्दाया छिनाफोना याकनं जुल धाःसा जो बाइडेनं वइगु जनवरीइ राष्ट्रपति पदया शपथ कयादी । वय्कःया कार्यकालय् कमला ह्यारिस उपराष्ट्रपति जुयादी । ह्यारिस अमेरिकी इतिहासय् उपराष्ट्रपति जुयादीम्ह न्हापांम्ह मिसा खः ।

ट्रम्पया चुनाव अभियानं मतगणनाय् अनियमितता व धाँधली जूगु द्वपं बियाच्वंगु दु । ट्रम्प अभियानया छम्ह वरिष्ठ अधिकारीं थ्व पालय् ताःहाकःगु चुनावी संघर्ष जुइगु थःपिंसं न्हापा हे सिउगु खँ सिबीएस न्यूजयात धयादीगु दु। वय्कलं न्ह्यःने लँपु दतल प्यदँ तक आशा ल्यनाच्वनी धयादीगु दु । वय्कलं थःपिं संघर्ष यायेत तयार दुगु धासें ‘भोटर फ्रड’ हटलाइनय् ज्या यायेगु सुरु जुइधुंकूगु खँ धयादीगु दु ।

सु खः बाइडेन ?
सन् २००९ निसें २०१७ तक बाराक ओबामा राष्ट्रपति जूबलय् बाइडेन निक्वलं उपराष्ट्रपति जुयादीम्ह खः । वय्कःयाके दशकौंया राजनीतिक अनुभव दु, लिसें वय्कः विदेश नीतिया ज्ञाता व प्रखर वक्ता कथं म्हसिउ । सामान्य नागरिक लिसे नं सहजपूर्वक घुलमिल जुइफुम्ह बाइडेनं थ्वयां न्ह्यव नं निक्वः तक ह्वाइट हाउसया नेतृत्व कायेगु कुतः यायेधुंकूगु खः । तर उबलय् सफल मजूम्ह वय्कः आः ७७ दँया वैशय् थ्यनेधुंकाः अमेरिकाया राष्ट्रपति जुइत ताःलाःगु दु ।

वय्कः अमेरिकाया राष्ट्रपति जुयादीम्ह दकलय् ज्याथम्ह व्यक्ति नं जुयादीगु दु । बाइडन ४७ दँ न्ह्यः सन् १९७३ य् हे अमेरिकी राजनीतिइ बांलाक खनेदयेकःवःम्ह खः । उबलय् वय्कः न्हापांखुसी अमेरिकी सिनेटया दुजः जुयादीगु दु। सन् १९८७ अथे धयागु ३३ दँ न्ह्यव नं वय्कलं राष्ट्रपति जुइगु निंतिं प्रचार न्ह्याकूगु खः । वय्कः मतदातायात अःपुक आकर्षिक यायेफुम्ह खःसां गुबलें गुबलें वय्कलं न्ववाइबलय् गलत वाक्य न्ववाइगुलिं यानाः लिउने लानाच्वंगु खः । भीडय् भाषण याःबलय् गलत खँ न्ववाःगुलिं हे वय्कःया न्हापांगु चुनावी अभियान सितिकं वंगु खः ।

वय्कलं छगू र्‍यालीइ सम्बोधन यायेगु झ्वलय् थः पुर्खा उत्तरपूर्वी पेन्सिल्भेनियाया कोइलाखानी ज्या याइपिं खः धयादीगु खः । तर वय्कःया सुं नं पुर्खां कोइलाखानी ज्या याःगु मदु। वय्कलं थ्व वाक्य छम्ह बेलायती राजनीतिज्ञ निल किनकया भाषण पाखें खुयाकाःगु जुयाच्वन ।

सम्बन्धित बुखँ

LEAVE YOUR COMMENTS