सर्गतं लुँवहः वा गात !

वा वइगु इलय् प्वं गाइगु, सामान्य खः । गबलें गबलें वा वइगु इलय् न्या, ब्यां, सर्प आदि कुतुं वइगु नं झीसं न्यना तयागु हे खः । तर सर्गतं लुँवह थेंज्याःगु जवाहरात कुतुं वःगु धइगु आतक न्यने नंगु मदुनि । यदि थ्व न्यनागु वा खनागु हे नं दुसा व काल्पनिक बाखं वा धार्मिक प्याखनय् जक सम्भव जुइ ।

तर हालसालय् सर्गतं लुँवहः कुतुं वःगु दु । छगू कथं वा गाःगु धाःसां पाइमखु । विश्वया हे दकलय् ख्वाउँसे च्वंगु थाय्कथं म्हसीया वयाच्वंगु साइबेरियाय् अज्याःगु हे घटना जूगु दु । साइबेरियाया आकाशय् छुं ठोस वस्तु कुतुं वल । व गुगुं च्वापुधी वा प्वं गाःगु हे खः न त वा वःगु हे खः । व ला सर्गतं कुतुं वःगु लुँवह खः ।

वास्तवय् खँ छु धाःसां साइबेरियाया याकुत्स विमानस्थलं कार्गो जहाजं उडान याःगु जुयाच्वन । गुगु जहाजय् ९.३ टन लुँवह दुगु खः । जहाजं उडान यायेगु झ्वलय् विमानस्थलया रनवेलय् लुँवहः कुतुं वयेगु शुरु जुल, थ्व क्रम जहाज च्वथ्यंक ब्वया वनाच्वंगु इलय् तकं जारी हे जुयाच्वन ।

साइबेरियाया विमानस्थलं करिब २० किलोमिटर तक धइथें जहाजं लुँवह कुतुं वयेगु क्रम जारी जुल ।साइबेरियाया विमानस्थलय् अवतरण यानाः इन्धन जायेकूगु छुं ई लिपा हे उडान याःगु निम्बु एअरलाइन्सया कार्गो जहाजया लुखा चाःगुलिं हे उकथं कच्चा लुवह कुतुं वःगु खः । थ्व क्रमय् करिब ३ टन बराबरया लुँवह जहाजं कुतुं वःगु खः ।