भुखाचं दुंगु छेँय् ल्हानाच्वंम्ह नकतिनि बूम्ह मचाया उद्धार
एजेन्सी- सिरियाय् भुखाचं यानाः छेँ दुनाः ल्हानाच्वंम्ह छम्ह नकतिनि बूम्ह ह्याउँमचाया उद्धार जूगु दु । टर्कि व सिरियाय् सोमवाः ब्वःगु भुखाचं यानाः छेँय् दुंगु खः । छम्ह प्वाथय् दुम्ह मिसां छेँय् ल्हानाच्वंगु अवस्थाय् हे उम्ह मचा बुइकूगु अनुमान दु । मचाया मांम्ह धाःसा सीधुंकूगु दु ।
अन्तर्राष्ट्रिय सञ्चार माध्यमतय्सं बिउगु जानकारीकथं भुखाचं यानाः न्यागू तल्ला दुगु छेँ दुनाः ल्हानाः च्वंम्ह मचाया उद्धार जूगु खः । मचाया मां, अबु व मेपि छेँजः धाःसा छेँय् ल्हानाः सीगु खः । मचायात लिकागु भिडियो सामाजिक सञ्जाल दु । भुखाय् ब्वःगु ३० घौ लिपा मचाया उद्धार जूगु खः । मचाया अवस्था स्थिर जूगु समाचार संस्था एएफपीं जानकारी बिउगु दु । ख्वाउँगु कारणं मचायात हाइपोथर्मिया जूगु दु । सामाजिक सञ्जालय् थज्याःगु यक्व हे उद्धारया पीडादायी भिडियो वयाच्वंगु दु ।
सीपिनि ल्याः अप्वयाच्वन
भुखाचय् लाःपिनि उद्धारया ज्या मदिक्क जुयाच्वंगु दु । थीथी देशया उद्धारकर्तात टर्की व सिरियाय् थ्यनेधुंकूगु दुसा उद्धारया क्रम जारी जुयाच्वंगु दु । निगुलिं देशय् यानाः सीपिनि ल्याः गुद्वः थ्यनेधुंकूगु दु । टर्कीइ जक ६२०० म्हं मल्याक मनूत सीगु दुसा सिरियाय् आःतक २५०० म्ह सिबें अप्व मनूत सीधुंकूगु बिबिसीं जानकारी बिउगु दु । विश्व स्वास्थ्य संगठनं थ्व भुखाचय् लानाः २० द्वः मनूत सीगु अनुमान यानातःगु दु ।
चिकुलाया मौसम जूगुलिं तसकं ख्वाउँसे च्वनाच्वंगुलिं उद्धार यायेत नं थाकुयाच्वंगु दु । अथे खःसां छें ल्हानाच्वपिं मालेगु ज्या जुयाच्वंगु दु । भुखाचं यानाः खुद्वलं मल्याक भवन दुंगु दु ।
भुखाय् कर विरुद्ध जनता तम्वल
थ्व हे दथुइ टर्की सरकार निगू दशक न्ह्यवनिसें कयावयाच्वंगु भुखाय् कर सरकारं गन खर्च यानाच्वन धकाः जनतां न्ह्यसः थनाहःगु दु । भुखाय् करयात कयाः टर्कीया जनता तंम्वयाच्वंगु दु । अनुमानित ८८ बिलियन लिरा (४.६ अर्ब अमेरिकी डलर) प्रकोप रोकथाम व आपतकालीन सेवाया विकासया निंतिं खर्च जुइमाःगु खः, तर थ्व खर्च गन जुयाच्वन धयागु खँ टर्की सरकारं मधाःनिगु बिबिसीं धाःगु दु ।
अधिकारीतय्सं थुकियात विशेष संचार कर धायेगु याना वयाच्वंगु दु । सन् १९९९ या भुखाय् लिपा थ्व कर कायेगु शुरु याःगु खः, तर खर्च गन जुयाच्वन धाःसा सीमदुनि । जनतां सन् १९९९ निसें बियाच्वनागु कर गन वन धकाः न्ह्यसः तयाच्वंगु खः ।
LEAVE YOUR COMMENTS