कलाःया छ्यं ज्वनाः पुलिस चौकीइ

मनूत निर्दयी जुइ लातकि गुलितक क्वह्यंगु ज्या याइ सुनां धाये फइमखु । भारतय् छम्ह मनुखं थः हे कलाःयात स्यानाः वयागु छ्यं ज्वनाः पुलिस चौकीइ वंगु घटना पिहां वःगु दु । भारतया मध्य प्रदेशया राजधानी भोपालं करिब ४५० किलोमिटर तापाःगु मुरैना जिल्लाया चम्बर इला धइगु थासय् उगु घटना जूगु खः ।

प्रहरीयाकथं कल्याण शाक्यवार नांया मनू व वया पंकज नांया कलाःया दथुइ न्हियान्हिथं धइथें ल्वापु जुयाच्वंगु खः । इपिं निम्हतिपूया दथुइ ल्वापु मजूगु दिं धइगु हे मदु । छन्हु थुकथं हे ल्वापुया झ्वलय् वंगु वाःया बुधवाःकुन्हु कल्याणं पां पालाः कलाःयात स्याना बिल । कलाःम्हेसित स्यानाखतं कल्याणं थः कलाःया छ्यं ध्यनाः ल्हातय् अथें ज्वनाः महुवा प्रहरी चौकीइ थ्यंकः वंगु खः ।

कल्याणं थः कलाःया छ्यं ज्वनाः लँय् वनाच्वंगु इलय् गुलिं ग्यानाः बिसिउँ वंगु खःसा गुलिसिनं धाःसा वयात ज्वनेतस्वःगु खः । तर ग्यानाः सुं नं वयागु न्ह्यःने वनेगु आँट धाःसा याये मफुगु खः । थः कलाःयात स्यानाखतं छ्यं ज्वनाः चौकीइ वःम्ह कल्याणं थः हे विरुद्ध उजुरी याःगु खःसा हत्या यानागु नं स्वीकार याःगु खः । वयां लिपा प्रहरी तत्काल वयात ज्वनाः घटनायात कयाः अनुसन्धान यानाच्वंगु दु । झिदँ न्ह्यः इहिपा जूपिं कल्याण व पंकजया स्वम्ह मस्त नं दु ।

 

सम्बन्धित बुखँ

LEAVE YOUR COMMENTS