फोटो पत्रकारतय् निंतिं कृत्रिम बौद्धिकता कार्यशाला
येँँ (नेपालभाषा टाइम्स) – फोटो पत्रकारतय् निंतिं ग्वसाः ग्वःगु निन्हुयंकंया कृत्रिम बौद्धिकता (एआई) कार्यशाला क्वचाःगु दु । राष्ट्रिय फोटो पत्रकार समूह (एनएफपिजे) नेपालं ‘फोटो पत्रकारया निंतिं कृत्रिम बौद्धिकता सीप ः व्यावसायिक क्षमता अभिवृद्धि’ विषयय् निन्हुया कार्यशाला ग्वसाः ग्वःगु खः ।
कार्यशालाय् एआई विज्ञ अजय शर्मां सहजीकरण यानादिसें फोटो पत्रकारिताय् कृत्रिम बौद्धिकताया प्रभावकारी छ्यलाबुला, अन्तर्राष्ट्रिय मापदण्डकथंया समाचार तस्बिरया विवरण (क्याप्सन) लेखन, समाचार श्रव्यदृश्य ज्वलंया निर्माण, गुणस्तरीय ध्वनि अभिलेखन, मोबाइल पत्रकारिता, कृत्रिम बौद्धिकता (एआई)पाखें तस्बिर, श्रव्यदृश्य सम्पादन, तथ्य प्रमाणिकरण, एआईया नैतिक छ्यला व डिजिटल पत्रकारिताया भविष्य लगायतया विषयय् सैद्धान्तिक व प्रयोगात्मक प्रशिक्षण बियादीगु खः ।
कार्यशालाय् ब्वति कयादीपिं फोटो पत्रकारतय्सं समाचरया ज्वलनय् आधारित अभ्यासपाखें व्यावसायिक किपाया विवरण च्वयेगु, श्रव्यदृश्य समाचार निर्माण, ध्वनि अभिलेखन व एआई उपकरणया सुरक्षा व प्रयोग सम्बन्धी व्यावहारिक ज्ञान हासिल याःगु एनएफपिजें न्ह्यथंगु दु । उगु इलय् समाचार कक्षय् कृत्रिम बौद्धिकताया प्रभावकारी उपयोग, उत्पादकत्व अभिवृद्धि व सम्पादकीय मापदण्ड कायम यायेगु बारे नं प्रशिक्षण बिउगु खः ।
बागमति प्रदेशया पुलांम्ह मन्त्रीलिसें प्रदेशसभा सदस्य रामकृष्ण चित्रकारं कार्यशालाय् ब्वति कयादीपिंत दसिपौ लःल्हानादीगु खः । ज्याझ्वलय् नवासें वय्कलं थौं कृत्रिम बौद्धिकता दक्वं ख्यःया निंतिं अपरिहार्य जुया वनाच्वंगु धासें थुकिया सही धंगं छ्यलाबुलां ज्यायात याकनं, सहज व प्रभावकारी याइगु जूसां दुरुपयोगया गम्भिर हाथ्या नं ब्वलने फु धासें जिम्मेवारीपूर्वक प्रयोग यायेमाःगु खँय् बः बियादिल ।
एनएफपिजेया पुलांम्ह नायःलिसें वरिष्ठ फोटोग्राफर राजभाई सुवालं आधुनिक फोटो पत्रकारिताय् एआई सम्बन्धी ज्ञान अत्यावश्यक जुइधुंकूगु खँ न्ह्यथनादिसें ईकथं अनुकूल जुइक प्रविधियात आत्मसात मयाइम्ह पत्रकार वइगु दिनय् प्रतिस्पर्धाय् लिउने लाये फइगु धारणा तयादिल ।
एनएफपिजेया नायः प्रदीपराज वन्तं संचार प्रविधिया तीव्र विकासलिसें फोटो पत्रकारयात एआईमैत्री सीप बियाः व्यावसायिक दक्षता अभिवृद्धि यायेगु उद्देश्यं कार्यशाला ग्वसाः ग्वयागु जानकारी बियादिल ।
LEAVE YOUR COMMENTS