ने. सं. ११४४ ञलाथ्व नवमी -

सरकार लिचिलेमाः

सरकारं आकस्मिककथं हःगु गुथि विधेयक । सरोकारवालालिसे छुं हे सहलह याइमखु । एकतर्फि, निरंकुश धंगं, गुथि विधेयक हयाः देय्या अमूल्य संस्कृति, सम्पदायात तहसनहस यायेत स्वइ । थौं विश्वय् नेपाः देय्या न्हाय् नेवाः संस्कृति, कला, सम्पदां तया वयाच्वंगु दु । नेवाः संस्कृति कलाया संरक्षण, सम्वद्र्धन यायेत गुथि प्रथा लिधंसा जुइ ।

तर थौं सरकारं गुथि प्रथाया मूल स्वरुपयात भंग यानाः थ्वयात थःगु न्ह्यब्वःसा यायेगु आशयं विधेयक पेस याइ ।नेवाःतय् संस्कृति, कला, सम्पदाप्रति असहिष्णु व घातक दृष्टिं हःगु विधेयकप्रति नेवाःत आक्रोशित जुइ । सरकारया गुथि विधेयकप्रति घोर आपत्ति प्वंकी । एकतावद्ध जुयाः नेवाःत थुकिया विरोधय् सतकय् कुहां वइ ।

‘गुथि विधेयक खारेज या ।’ लखौं नेवाःतय्सं सः थ्वयेकी । ध्वंसात्मक गुथि विधेयकया विरोधय् नेवाः जनता जुरुमुरुं दना वःगु खनी । सरकारं विधेयक लित कयागु बुखँ पिकाइ । तर सरकारं विधेयक लित कयाः धाःसां सरकारप्रति आन्दोलनकारी नेवाः जनता विश्वस्त जुइ मफुनि । ‘लित कयागु’ नाटक यानाः हाकनं गुथि विधेयकयात छलछाम विधिं पास यायेफु ।

नेवाः जनता सशंकित तिनि । सतर्क तिनि !खतुं । थौं देशय् दुने दुगु सम्पूर्ण नेवाः संस्कृति, कला व सम्पदा देय्यागु हे खः । राष्ट्रिय सम्मान व संरक्षण देय्या दक्व कला, संस्कृति, सम्पदायात दयेमाः । तर थौं देय्या हे गौरवया थां जुयाच्वंगु नेवाःतय् संस्कृति, कला, सम्पदायात जातीय संकीर्णताया मिखां स्वयाः छाय् थ्वयात न्हंकेत स्वल ?

देय्या सम्पूर्ण ख्यः थौं विचौलिया, दलाल, माफियातय् ल्हाती । सम्पूर्ण सरकारी संयन्त्र थुमिगु पकडय् । थौं सत्तासिन नेतातय् जीवनशैलीं क्यनी । इपिं स्वयम जनमुखी खः कि सामन्ती ?

छाय् सरकारं राष्ट्रिय दृष्टिं थ्वया संरक्षणप्रति दायित्वबोध याये मफुत ? अःखः घातक गुथि विधेयक हयाः छाय् देय्या अमूल्य कला, संस्कृति, सम्पदायात तासया छेँ थें थुनेत स्वल ? सम्पूर्ण देय्या गौरवया न्हाय् जुयाः अन्तर्राष्ट्रिय जगतय् धस्वानाच्वंगु नेवाःतय् कला, संस्कृति, सम्पदायात छाय् निर्मम प्रहार यायेत स्वल थौं सरकारं ?

थ्व न्ह्यसःया सरोकार गुथिया विधेयकलिसे जकमखु आखिर सरकारं देय्या राष्ट्रियताया नामय् छु गुगु निर्मम संकीर्णता नालेत्यंगु दु, व लिसे नं दु । छम्ह बुज्रुक मन्त्रीं गुथि सामन्ती व्यवस्था खः, थुकियात जिपिं कम्युनिष्टतय्सं स्वीकार याये फइमखु । खूब तीसलं बके याइ । ‘मन्त्रीजु ! छिगु सामन्तीवादी विचाःयात स¥हाना याये ।

जिपिं जनता गुगुं नं सामन्तीवादया विरोधी खः । तर । थौंकन्हय् थःगु सिद्धान्तप्रति प्रतिवद्धता व इमान्दारिता स्वयां सिद्धान्तया आकर्षक खँग्वः ल्ययाः,छ्यलाः जनताया दथुइ छलछामया राजनीति म्हितेगु खेल, तिकडम प्रचुर मात्राय् जुइ । नेतातय् थ्व हे तिकडमया चक्रवातय् जनता निरीहकथं फसे जुइ ।

मन्त्रीजु ! संसदय् दुगु दुइ तिहाईया मत धइगु ला अंक जक खः । सिद्धान्तप्रतिया इमान्दारिता ला सत्तासिन नेतातय् आचरणं क्यनी । गुगु धंगं थौं देशय् शासन व्यवस्था न्ह्याः वनाच्वन व छु छिकपिनिगु घोषित कम्युनिष्ट राजनैतिक सिद्धान्तकथं जुयाच्वंगु दु ला ? देय् थौं गुगु राजनीतिक व्यवस्थां न्ह्याः वनाच्वन ।

व स्पष्ट जू ला ? निगः प्यंगः क्रान्तिकारी खँग्वःत ल्ययाः, छ्यलाः जनतायात ध्वं लायेगु हे सिद्धान्तमुखी राजनीति जुइला ?परोक्षरुपय् देय्या सम्पूर्ण ख्यः थौं विचौलिया, दलाल, माफियातय् ल्हाती । सम्पूर्ण सरकारी संयन्त्र थुमिगु पकडय् । थौं सत्तासिन नेतातय् जीवनशैलीं क्यनी । इपिं स्वयम जनमुखी खः कि सामन्ती ?

स्वनिगःवासीत थथे हे भूमाफियातय् चक्करतय् लानाः याकनं भूमिहीन जुयाः विस्थापित जुइमाली । नेपालय् अनेक बैंकत वल । देय्या उत्पादनशील ख्यलय् लगानी यानाः देय्या आर्थिक विकास यायेगुपाख बैंकतय्सं विचाः मयाः । भूमाफिया, विचौलिया, दलालतय् चलेखलया निंतिं बैंकत आर्थिक श्रोत जुइ ।

थौं लँ तब्या यायेगु नामय् छेँखात थुनेगु, गांगामय् रिंगरोड थ्यंकेगु, अनेक योजनात भूमाफियातय् इशाराय् जुइ । थौं गुथि विधेयक नं भूमाफियातय् इशाराय् वयाच्वंगु दु । आम जनताया धारणा जुइ । स्वनिगःया सांस्कृतिक गौरव, कला, सम्पदाया भण्डारयात भष्म यानाः देशय् सत्ताधारीतय् एकल संस्कृतियात कायम यायेगु महत्वकांक्षी पलाः खः गुथि विधेयक ।

सरोकारवालातय्त शंका जुइ । गुथि प्रथाय् ईया मागकथं छुं उखेथुखे यायेमाःसा सरोकारवालातय्त सरकारं सुझाव बी फु । तर गुथि प्रथायात ह अन्त्य यानाः नेवाः संस्कृति, कला, सम्पदायात ह न्हुया छ्वयेगु सरकारया कुतः नव सामन्तीवादी प्रवृत्ति खः । थ्व कुतलं सरकार लिचिले हे माः ।