सर्कसया खेल व जोकर

पर्यटन मन्त्री पे्रम आलें थौंकन्हय् बजाः क्वाका च्वंगु दु । भ्रष्टाचार, अनियमितताया विरोधय् मन्त्री आलें कडी कडाउ पलाः छिनाच्वंगु दु । ‘नियम विपरीत गुगुं नं ज्या याःपिंत जिं गुगुं नं हालतय् बाँकी तये मखु, आवश्यक जूसा जिं कठोरतम दण्ड नं बीत लिफः स्वयेमखु ।’ म्हुतुं धाःगु जक मखु, मन्त्री आलें थम्हं धाःथें ज्या नं क्यनेत स्वयाच्वंगु दु । मन्त्री आलें भ्रष्टाचार, अनियमितता याइपिनि खिलाफय् काःगु कदमयात कयाः थौंकन्हय् तीव्र चर्चा जुयाच्वंगु दु् । । पक्ष, विपक्षय् ।

थौं देय् प्रशासनया हर क्षेत्रय् भ्रष्टाचार, अनियमिततां हा कयाच्वंगु दु । जनतां थौं गुगुं नं सरकारी सेवा कायेमाःसा घूस नकेमाः। ध्यबा फुके फुसा न्ह्याथेंज्याःगु मजिउगु निर्णय नं याके फइ । ध्यबा मदुपिंसं थःगु पक्षय् सरकारी न्याय काये सम्भव मजू । राजनीतिक विचौलियातसें थौंकन्हय् शक्तिया आडय् भ्रष्टाचार यायेत प्रोत्साहित यानाच्वंगु दु । आम जनमानसय् सरकारप्रतिया थज्याःगु नकारात्मक प्रभाव, छाप लानाच्वंगु इलय् मन्त्री आलें भ्रष्टाचारी, नियम मिचे यानाः थःगु स्वार्थ सिद्ध याइपिंत थुकथं दण्ड चले यानाः हल । उकिं देशय् भ्रष्टाचार निर्मूल यायेत तिबः जुइ । विश्वास याइपिं खनेदइ । मन्त्री आलें भ्रष्टाचार, अनियमितता विरोधय् काःगु साहसी कदमतपाखें प्रभावित जुयाः देशय् पे्रम आले थेंज्याःम्ह निम्ह प्यम्ह मन्त्री दःसा देय् स्वर्ग जुइ धकाः उत्साहित जूपिं मनूत नं खनेदइ ।

पे्रम आलेयात मन्त्री जक मखु, प्रधानमन्त्री हे जूगु स्वये दयेमा । सरकार प्रमुख जुयाः नेतृत्व काये दुसा पे्रम आलें छगू विभागं जक मखु, देशं हे भ्रष्टाचार, अनियमिततायात निर्मूल याना छ्वइ । पे्रम आलेयात थुकथं च्वछाया जुइपिं समर्थकत नं दु । सरकारय् थौं मेमेपिं नं मन्त्रीत दु । तर मन्त्री आलें थें अन्य मन्त्रीतय्सं थःत उलि प्रचारय् हये फुगु खने मदु । पे्रम आले हे थौंया मन्त्रीमण्डलया आकर्षणया केन्द्र जुयाः लूगु दु । मन्त्री आलें नं थः भ्रष्टाचार, अनियमितताया विरोधय् न्ह्यागु कथंया चुनौति फयेमाःसां न्ह्याः वने, सक्रिय जुइ । तत्पर जुइ । ज्यान पाये माःसां सुं खनाः ग्याये मखु । मच्चे जुयाः थःगु प्रतिवद्धता जोहर याइ ।

छखे मन्त्री आलेया भ्रष्टाचार, अनियमितताप्रतिया असहिष्णुतायात कयाः च्वछाइ पिं दुसा मेखेर मन्त्री आलें भ्रष्टाचार, अनियमितताप्रति क्यनाच्वंगु चासो मात्र राजनीतिक चालबाजी जक खः । केपी ओलीयात धोखा बिया वःगु ज्यायात त्वपुइत स्वयाच्वंगु हर्कत जक खः । केपी ओलीलिसेया तं क्वलाकेगु जुक्ति जक खः । विकृत राजनीतिक संस्कारं थना हःगु आक्रोश व प्रतिशोधया नौटङ्की जक खः । मन्त्री आलेया भ्रष्टाचार, अनियमितता विरोधी पलाःयात थुकथं कुंखिनीपिं नं दु ।

उद्योग संघया छम्ह पदाधिकारीं मन्त्री आलेया कथित भ्रष्टाचार, अनियमितताया त्वहः, उद्योगधन्दा याइपिंत प्रहार यानाः इमिगु मनोबल ¥हास यायेगु उद्देश्यं अभिपे्ररित धकाः तीव्र आलोचना याःगु दु । कोभिड संक्रमण प्रहारं ग्रस्त उद्योगधन्दायात मन्त्री आलेया भष्टाचारी, अनियमितताया कथित कदमं उद्योगधन्दा अझं ¥हासोन्मुख जुइ । उद्योग सम्बन्धी जिम्मा कयाच्वंम्ह प्रधानमन्त्रीं थ्व खँय् जायज चिउताः छाय् मकाल ? पदाधिकारीं जिज्ञासा नं प्वंकी ।

मन्त्री आलेया भ्रष्टाचार, अनियमितता विरोधया कदमयात प्रचारवादी जक खः । वादविवाद मयाये । कारण वादविवादं खँ जक ताःहाइ । निष्कर्ष वये फइमखु । तर छता खँ जरुर न्ह्यथनेबह जुइ । थौं सरकार धायेबलय् पर्यटन मन्त्रालय जक मखु, मन्त्री धायेबलय् मन्त्री आले एकल जक मखु । सरकारया अनेक मन्त्रालय दु । मन्त्रीत ग्वाः ग्वाः दु । भ्रष्टाचार, अनियमितता थौं सरकारया हर मन्त्रालयय् उतिकं व्याप्त । थौं देय्या गुगुं महत्वपूर्ण संस्था मदु भ्रष्टाचार व अनियमितताया रोगं मथिउगु । ग्रस्त मजूगु । तर मन्त्री आलेया सः जक छाय् थीगु ? पर्यटन मन्त्रालय जक छाय् निशाना जूगु ? सरकारं भ्रष्टाचार व अनियमितता समष्टिगत रुपं गन गन जुयाच्वंगु दु ? उतिकं महत्व बियाः छाय् स्वयेगु विचाः मयात ? छाय् मन्त्री आले थौं मेमेपिं मन्त्रीतय्सं थें थःथःगु मन्त्रालय, थःथःगु मातहतया संस्थाय् जुयाच्वंगु भ्रष्टाचार व अनियमितताया खोजी मयात ?

थौं जनताया न्ह्यसः थ्व खः । इमान्दारकथं भ्रष्टाचार व अनियमितताया खोजी जूसा थन सुं नं राजनीतिक नेतात दोष मुक्त जुइ फइमखु । देशय् थौं जुयाच्वंगु भ्रष्टाचार व अनियमितताया मूल कारण, लिधंसा राजनीतिक संरक्षण खः । देशय् गुगुं क्षेत्र, ख्यः मदु राजनीतिक हस्पक्षेपं मथिउगु । उकिं गुगुं दलया राजनीतिक सरकारं नं भ्रष्टाचार व अनियमितताया विरोध जनतयात क्यनेगु वा जक खः, वास्तविककता इमिगु न्ह्ययेगु वा अनियमिता व भ्रष्टाचारया वास्तविक हे खः । उकिं मन्त्री आलें न्ह्याकूगु भ्रष्टाचा, अनियमितताया अभियान नं मात्र सर्कसया खेल जक खः, गन मन्त्री आलें थःत छम्ह जोकर जक सावित याये फइ । छम्ह नांजाःम्ह पत्रकारं धाइ ।

सम्बन्धित बुखँ

LEAVE YOUR COMMENTS