डबल नेकपाया नेता कार्यकर्तातय्त सुझाव

वर्तमान सरकारया नेतृत्व यानाच्वंगु दल नेपाल कम्युनिष्ट पार्टी (नेकपा)या नेता कार्यकर्तातय्त प्रधानमन्त्री नापं पार्टीया निम्ह मध्ये छम्ह अध्यक्ष केपी शर्मा ओलीं आः मोहनी व स्वन्ति नखः जनताया दथुइ वनाः न्यायेकेत नापं सरकारं याःगु बांलाःगु ज्याखँ कनेत व जनताया खँ न्यनेत निर्देशन बियादीगु दु ।

प्रधानमन्त्री ओलीं अथे पार्टीया नेता कार्यकर्तातय्त निर्देशन बियादीगु जूसां नं वर्तमान सरकारया बांलाःगु जनतां अनुभूति यायेफइगु कथंया ज्या छु जूगु दु धकाः धाःसा खास हे कनादीगु मदु । व हे सरकार संचालन यानागु, अन्तर्राष्ट्रिय स्वापू बांलाकागु, थीथी कथंया विकास निर्माणया ज्यायात तीब्रता बियागु, संविधानयात कार्यान्वयनपाखे वनाच्वंगु दु धकाः धायेगु बाहेक मेगु खास हे खँ धायेगु मदु अले कनेगु खँ नं मदु ।

जनतां संघीय लोकतान्त्रिक गणतन्त्र वये धुंकाः राजनीतिक रूपं हिउपाः नाप नापं थःपिनिगु जीवनय् नं हिउपाः वइ धकाः आशा याःगु कथं छुं नं ज्या जूगु महसूस तकं यानाच्वंगु खने मदु । उकिं डबल नेकपाया नेता कार्यकर्तात यदि मोहनी व स्वन्ति नखःया इलय् जनताया थाय् वन धाःसा जनताया गुनासो अले जनताया न्ह्यसः जक न्यना वयेत बाध्य जुइगु अवस्था दु ।

जनतां संघीय लोकतान्त्रिक गणतन्त्र वये धुंकाः राजनीतिक रूपं हिउपाः नाप नापं थःपिनिगु जीवनय् नं हिउपाः वइ धकाः आशा याःगु कथं छुं नं ज्या जूगु महसूस तकं यानाच्वंगु खने मदु ।

अथे जनतां याइगु न्ह्यसः न्यना वयेगु हे जूसां नं छु छु न्ह्यसः वयेफु धइगु खँयात ध्यानय् तया वन धाःसा कमसेकम पार्टीया नेता कार्यकर्तातय्त अःपुइगु तायेका । दत्याया ई पुलाः न्ह्यायेधुंकूगु ओली सरकारयाके जनतां सरकार नाप स्वाका न्यनेफुगु न्ह्यसःत थुगु कथं खनेदुः

१) गैर न्यायिक सडक विस्तारया नामय् गुगु कथं तीब्र गतिं ज्या यात उकियात कया सर्वोच्च अदालतं मुआब्जा क्षतिपूर्ति बिया, सम्पदायात बचे यानाः, नियम कानुन कथं जनताया सहमति कया जक जनताया जग्गा कया ज्या या धकाः आदेश बिउगु अले उकिया विरुद्ध सरकार स्वयं हे पुनवरालोकनय् वंगु अवस्थाय् पुुनवरालोकनयात तकं खारेज याये धुंकूगु अवस्थाय् नं गुलिं गुलिं थासय् स्थानीय सरकारया जनप्रतिधि व कार्यकर्तात परिचालन याना गैर न्यायिक सडक विस्तार यानाच्वंगु धइगु सरकारं सर्वोच्चया आदेशयात मानेयाये मखु धकाः धाःगु खः ला कि छु खः धकाः जनतां न्ह्यसः तइगु अवस्था दु ।

२) ओली सरकारं जनताया नितिं गुगु कथं ज्या यायेगु धयाच्वंगु दु तर जनताया नितिं कर अप्वयेकेगु ज्या यानाच्वन, स्वंगू तहया सरकारया नामय् जनतायात दुःख बियाच्वन धकाः तकं आम जनतां थुइकाच्वंगु दु । थुगु खँय् जनतां न्ह्यसः तइगु अवस्था दु उकिं थुगु कथंया न्ह्यसःया बारे नं बिचाः याना वन धाःसा बांलाइ ।

३) सरकारं गुथि विधेयक हल अले जनतां विरोध यायेवं लित काल । आः गुथि विधेयकया सवालयात कयाः सरकारं छु यायेत्यंगु दु ? जनतां गुथियात स्वायत्तता बिइमाः धयाच्वंगु सवालय् सरकारया लिसः छु खः धकाः जनतां न्ह्यसः तइगु अवस्था दु ।

४) ३३ किलो लुँ काण्ड जुल अले अपराधीत आः तक नं लुकइके मफुनि । लुँ काण्ड नाप स्वापू दुपिं लगातार स्वम्हेसिया हत्या जुल धकाः वायच्वंगु दु उकिया बास्तविकता छु खः ?

५) ओली सरकारया इलय् हे कन्चनपुरया निर्मला हत्याकाण्ड जुल । थ्व हत्या काण्डयात कया आः तक नं सरकारं दोषीयात ज्वना कारवाही यायेफुगु अवस्था मदुनि । थुकिं याना सरकार व सुरक्षा निकायात जनतां न्ह्यसः तयाच्वंगु दु ।

६) मुलुक धर्म निरपेक्ष राज्य जूसां नं प्रधानमन्त्री ओली स्वयं हे क्रिश्चियनतय्गु ज्याझ्वलय् सक्रिय जुया ख्रिष्टियन धर्म गुरु नु म्योड मुनया शुक्रकिट अर्थात विर्य होली वाइन तकं सेवन यात धकाः ब्यापक रूपं प्रचार जुल नाप नापं इमिगुपाखें हे प्रधानमन्त्रीयात सम्मान कथं सिरपाः नं बिउगु खँ दु । थुकिया बास्तविकता छु खः धकाः जनतां न्ह्यसः तइगु अवस्था दु ।

७) सर्वहारा वर्गया नेतृत्व यानागु धकाः दावी याइगु अले समाजवादपाखे वनेगु धाइगु सरकारया हे नेतृत्व यानाच्वंगु दलया नेतातय्सं वालुवाटार काण्ड यात । बालुवाटार जग्गा तकं नल । जनतां ल्वःमंके हे फइमखुगु कथंया बालुवाटार काण्ड जूगु दु । उकिं थुगु विषययात कयाः नं जनताया नुगलय् न्ह्यसः दइ ।

८) मिडिया विधेयकया सवालय् सरकारं याकःति कथं यंकल अले समग्र संचार जगत आन्दोलनय् क्वहां वल । थ्व विधेयक धइगु जनताया अधिकारया विरोधी खः धकाः तकं प्यखेरं धयाच्वंगु दु । छु सरकारं सरोरकारवाला पक्षलिसे सहलह हे मब्याकूसे अथे दुई तिहाई बहुमत दुगु नामय् विधयेक यंकाः पारित यायेगु योजना खः ला ?

९) लोकसेवा आयोगपाखें विज्ञापन आह्वान यात । व विज्ञापन नेपाःया संविधानया भावनाया अःखः जुल धकाः नेपाःया आदिवासी जनजाति, मधेसी, दलित, मुस्मांनिसें फुक्क उत्पीडित समुुदाय आन्दोलनय् क्वहां वल । लोकसेवा आयोग काण्ड धइगु समावेशीता विरोधी, संघीयता विरोधी धकाः धयाच्वंगु दु ।

बास्तवय् डबल नेकपाया मिखाय् समावेशीता व संघीयता छु खः धकाः न्ह्यसः तइगु अवस्था दु । उगु हे कथं केपी ओली नेतृत्वया वर्तमान दुई तिहाई बहुमतया सरकारयात वाइडडी काण्ड, भेनेजुएला काण्ड, सिण्डीकेट काण्ड, विषादी काण्ड लगायतया यक्व कथंया काण्डयात कयाः जनतां डबल नेकपाया नेता कार्यकर्तातय्त न्ह्यसः तइगु अवस्था दु ।

उकिं मोहनी व स्वन्ति नखःया इलय् जनतायाथाय् वनेगु खःसा अले जनतालिसे साक्षात्कार यायेगु नापं सहलह ब्याकेगु खःसा थज्वःगु कथंंया न्ह्यसःया लिसः गुगु कथं बिइगु धकाः शीर्ष नेतातय्त नापलाना तयार याना वनेमालीगु अवस्था दु । मखुसा जनतां न्ह्यसः न्यनी अले थःपिं लिसः बिइ मफया लिहां वयेमालीगु अवस्था वइ धकाः थुइकेमाः ।